2021-02-23 1074
حەسەن نازم
وتەبێژی حکومەتی عێراق پشکی هەرێمی کوردستان له‌ناو پرۆژه‌یاسای بودجه‌دا بە "گرێ کوێرە" ناو دەبات‌و ده‌ڵێت، جگە لەپشکی هەرێم رێککەوتنی کۆتایی لەسەر هەموو بڕگەو مادەکانی پڕۆژە یاسا کراوە.
ئاوێنه: له‌دوای كۆبونه‌وه‌ی ئه‌مڕۆ سێشه‌ممه‌ی ئه‌نجومه‌نی وه‌زیرانی عێراق، حەسەن نازم، وتەبێژی ڕه‌سمی ئەنجومەنی وەزیرانی عێراق رایگەیاند، جگە لەپشکی هەرێم رێککەوتنی کۆتایی لەسەر هەموو بڕگەو مادەکانی پڕۆژە یاسای ئەمساڵ کراوە.
حەسەن نازم ئاماژەی بەوەشکرد، پشکی هەرێم "گرێ کوێرەی" پڕۆژە یاسای بودجه‌ی ٢٠٢١ی عێراقە.
هاوكات مستەفا کازمی، سەرۆکوەزیرانی عێراق لەکۆبونەوەكه‌دا رایگەیاند، ئابوری عێراق لەتشرینی یەکەم‌و دووەمی ساڵی رابردو گەیشتە ئاستی داروخان، بەڵام رێکارەکانی حکومەت لەبوارەکانی ئابوری‌و دژایەتی گەندەڵی توانی وا بکات ئەو ئاستە مەترسیدارە تێپەڕێنن.
وتیشی، "پلانێکی ئابوری وردمان بەدەستەوەیە بۆ بوژاندنەوەی ئابوری عێراق.
ئه‌وه‌شی وت، لەکۆتایی ئەم مانگەدا یەدەگی دراوی بیانی لەبانکی ناوەندی عێراق دەگاتە 4 ملیار دۆلار، ئابوری عێراق هەنگاو بەرەو باشتر دەنێت.