ئاسایشی سلێمانی دەستگیركردنی باندێكی هەشت كەسی بە تۆمەتی دزینی بڕە
پارەیەكی زۆر لە دو كاسبكاری نوسینگەی ئاڵوگۆڕی دراو لەناو شاری سلێمانی،
راگەیاند.
ئاوێنە: بەڕێوەبەرایەتی ئاسایشی پارێزگای سلێمانی، ئەمڕۆ هەینی، لە
راگەیەندراوێكدا وتی: بەبڕیاری دادوەرو لە چەند چالاکییەکی جیاوازدا لە نێوان ڕۆژانی
(٢٠٢١/٢/٧ بۆ ٢٠٢١/٢/٢٢)، لەناو شاری سلێمانی، ھێزەکانیان باندێکی (٨) کەسیان دەستگیركردون
کە سەرجەمیان بە ڕەچەڵەک کوردن و ھەستاون بە ئەنجامدانی دو تاوانی جیاواز لە دو
کات و شوێنی جیاوازدا.
بەپێی راگەیەندراوەكە، تاوانەکانی ئەو باندە بریتی بون لە دزینی پارە لە دو
کاسبکاری نوسینگەی ئاڵوگۆڕی دراو لەناو شاری سلێمانی، کە لە تاوانی یەکەمدا بڕی 60
هەزار دۆلاری ئەمریكی و لە تاوانی دوەمدا 47 ملیۆن دیناری عێراقیان لەو کاسبکارانە
سەندوە.
ئاسایشی سلێمانی ئاماژەی بەوەداوە كە ئەندامانی ئەو باندە، پاش ئەنجامدانی
تاوانەکانیان و خۆحەشاردانیان، دەستگیركراون.
ئەوەشی خستۆتەڕو كە لە ئێستادا بەفەرمانی دادوەر تۆمەتبارەكان ڕاگیراون و لێکۆڵینەوە
لەکەیسەکەیان بەردەوامە.
بەپێی راگەیەندراوەكە تۆمەتبارەكان پێكهاتون لە:
(م ، أ ، س/ لەدایکبوی ساڵی ١٩٩١)
(ع ، ع ، ع / لەدایکبوی ساڵی ١٩٨٦)
(ڕ ، م ، ل/ لەدایکبوی ساڵی ١٩٨٧)
(ب ، ح ، ع/ لەدایکبوی ساڵی ١٩٨٩)
(ی ، أ ، س/ لەدایکبوی ساڵی ١٩٧٩)
(ب ، ح ، ع/ لەدایکبوی ساڵی ١٩٩٧)
(س ، أ ، أ/ لەدایکبوی ساڵی ١٩٩٨)
(خ ، ح ، ع/ لەدایکبوی ساڵی ١٩٨٦)