لەبەرامبەر ئەو کێشەو گرفتانەی بۆ گواستنەوەی بارەکانی بازرگانان دروستبوە
بازرگانانی ناو عەلوەی سلێمانی لە سبەی دوشەممەوە هاوردەکردنی سەوزەو میوە رادەگرن.
ئاوێنە، زریان محەمەد: عەتا محەمەد، نوێنەری کاسبکارانی عەلوەی سلێمانی بە
ئاوێنەی ڕاگەیاند"ئێوارەی ئەمڕۆ هەشت ئۆتۆمبێلی بارهەڵگرمان لەلایەن ژمارەیەک
لە شۆفێرانی مەرزی باشماخەوە هێرشکراوەتە سەریان و زیان بەر ئۆتۆمبێلەکان کەوتوە گەر
هێزەکانی ئاسایش و پۆلیس فریایان نەکەوتنایە زیان بەر شۆفێرەکانیش دەکەوت."
راشیگەیاند"وەک بازرگانانی ناو عەلوەی سلێمانی بڕیارماندا لە ڕۆژی دوشەممەوە
هاوردەکردنی سەوزەو میوە ڕابگرین لە هەمو سنورەکانی ئێرانەوە تا ئەو کێشەی بارهەڵگرانە
چارەسەر نەکرێت."
ئاماژەی بەوەشدا، ئێمە ئۆتۆمبێلی تایبەت بەخۆمان هەیە کە بارەکان لە وڵاتی
ئێرانەوە ڕاستەوخۆ دەهێنێت بۆ سلێمانی و تەواوی شارەکانی عێراق بۆیە پێویستمان بەوە
نییە بارەکانمان لە مەرز بخەینە ناو ئۆتۆمبێلێکی دیکە گەر بارهەڵگرەکانی باشماخ هەر
بارێکمان بە نرخی ٢٠٠ هەزار دینار بۆ بهێنن ئامادەین بارەکانیان بدەینێ.
رۆژی یەکشممە شۆفێرانی بارهەڵگری هێڵی مەرزی باشماخ لەبەردەم بینای پارێزگای
سلێمانی گردبونەوەیان ئەنجامداو نیگەرانیان دەربڕی لەبەرامبەر خاوبونەوەی کارەکانیان.