بریكاری وەزارەتی تەندروستی: ئەگەری زۆرە سبەی بڕیاری داخستنەوەی دەرگای خوێندنگەكان بدرێت
  2021-02-28       546       

د. رەهێڵ فەرەیدون، بریكاری وەزارەتی تەندروستی هەرێمی كوردستان رایگەیاند، سبەی لیژنەی باڵای روبەڕوبونەوەی كۆرۆنا كۆدەبێتەوەو ئەگەری زۆرە بڕیار بدات جارێكی تر ناوەندەكانی خوێندن بۆ ماوەیەك دابخرێنەوە.

ئاوێنە: د. رەهێڵ فەرەیدون، بریكاری وەزارەتی تەندروستی هەرێم، كەمێك لەمەوبەر بە ماڵپەڕی رەسمی یەكێتی راگەیاند: ژمارەی توشبوان بەكۆرۆنا لەهەرێم لەهەڵكشاندایەو زۆر زیادیكردوە، بۆیە سبەی 1ی ئاداری 2021 لیژنەی باڵای روبەڕوبونەوەی كۆرۆنا كۆدەبێتەوەو دو بابەتی گرنگیش تەوەری كۆبونەوەكە دەبن.

ئاماژەی بەوەشداوە كە یەكێك لە بابەتەكان جێبەجێنەكردنی بڕیاری پێشترە بۆ داخستنی سنورەكان و رێگەدان بەهاتنی گەشتیاران بەتایبەت لەناوچەكانی تری عێراقەوە بۆ هەرێم كە پێشتر بڕیاردرابو هاتنی گەشتیاران قەدەغە بكرێت.

وتیشی: تەوەرێكی تر لەبارەی پڕۆسەی خوێندنەوە دەبێت، چونكە چوارەم هەفتەیە پرۆسەی خوێندن دەستیپێكردوەتەوەو دۆخی توشبون بەكۆرۆنا لەناوەندەكانی خوێندن لەپەروەردەو زانكۆكان زیادیكردوە، بۆیە ئەگەرێكی زۆر هەیە لیژنەی باڵای روبەڕوبونەوەی كۆرۆنا بڕیار بدات بۆ ماوەیەكی كاتی دەرگای خوێندنگەو زانكۆكان دابخرێنەوە.

بریكاری وەزارەتی تەندروستی هەرێم راشیگەیاند: لەناو ناوەندەكانی خوێندن وەك پێویست رێنماییە خۆپارێزییەكان جێبەجێنەكراون، بۆیە ئامارەكانی توشبون بەكۆرۆنا زیادیان كردوە.


زۆرترین بینراو
© 2021 Awene Online, Inc. All Rights Reserved.
×