نێچیرڤان بارزانی، سەرۆكی هەرێمی كوردستان ئیدانەی هێرشە موشەكییەكەی ئەمڕۆی بنكەی سەربازی عەین ئەسەد لە پارێزگای ئەنبار دەكات و دەشڵێت: بەردەوامی هێرشەكان بۆ سەر هێزەكانی هاوپەیمانی نێودەوڵەتی ئێستا و داهاتوى عێراق ده‌خاته‌ مه‌ترسييه‌كى ڕاسته‌قينه‌وه‌.

ئاوێنە: نێچیرڤان بارزانی لە راگەیەندراوێكدا وتویەتی"زۆر به‌توندى سه‌ركۆنه‌ى ئه‌و هێرشه‌ موشه‌كييه‌ ده‌كه‌م كه‌ ئه‌مڕۆ چوارشه‌ممه‌ هێزه‌كانى هاوپه‌يمانيى نێوده‌وڵه‌تى به‌ سه‌ركردايه‌تيى ئه‌مه‌ريكا له‌ بنكه‌ى عه‌ينولئه‌سه‌دى ئاسمانى له‌ پارێزگاى ئه‌نبار له‌ عێراق كرده‌ ئامانج و له‌ ئه‌نجامدا به‌ڵێنده‌رێك گيانى له‌ ده‌ست دا."

سەرۆكی هەرێم جەختی كردۆتەوە كە "دوباره‌بونه‌ى به‌رده‌وامى په‌لاماردان و هێرش له‌سه‌ر هێزى هاوپه‌يمانيى نێوده‌وڵه‌تيى دژى داعش كه‌ له‌سه‌ر داواى حكومه‌تى عێراقى فيدراڵ بۆ پشتگيرى و هاوكاريكردنى له‌ به‌ره‌نگاربونه‌وه‌ى تيرۆر له‌ عێراقن، به‌ته‌واوى دژى به‌رژه‌وه‌ندييه‌كانى عێراقه‌ و ئارامى و سه‌قامگيريى وڵات و ئێستا و داهاتوى ده‌خاته‌ مه‌ترسييه‌كى ڕاسته‌قينه‌وه‌."

نێچیرڤان بارزانی داوای له‌ حكومه‌ت و په‌رله‌مان و هێز و لايه‌نه‌ سياسييه‌كان و پێكهاته‌ و گه‌لانى‌ عێراق كردوە به‌رامبه‌ر ئه‌م هێرش و په‌لامارانه‌ بێنه‌ ده‌نگ و ڕێگه‌نه‌درێت له‌سه‌ر حيسابى به‌رژه‌وه‌ندييه‌كان و داهاتوى ئه‌وان، عێراق بكرێته‌ گۆڕه‌پانى پێكدادان و يه‌كلاكردنه‌وه‌ى ململانێكان.