2021-03-06 379
سەرۆککۆماری ئێران لە پەیوەندییەکی تەلەفۆنیدا لەگەڵ سەرۆکوەزیرانی عێراق ڕایگەیاند، وڵاتەکەی هەمیشە ئەولەویەتیداوە بەوەی عێراق یەکپارچە بێت و ئارامبێت، چونکە ئارامی عێراق پەیوەستە بە ئێرانیشەوە.
ئاوێنه: بەپێی هەواڵی سایتی سەرۆکایەتی کۆماری ئێران ئێوارەی ئەمڕۆ 6 ی ئازار، حەسەن ڕۆحانی، سەرۆککۆماری ئێران و مستەفا کازمی، سەرۆکوەزیرانی عێراق، گفتوگۆیەکی تەلەفۆنیان ئەنجامداوە و لە پەیوەندییەکەدا گفتوگۆی توندوتۆڵکردنەوەی پەیوەندییە ئابوری و سیاسییەکانی هەردوولا کراوە.
حەسەن ڕۆحانی ڕایگەیاندووە، “ئێمە هەموو دەستوەردانێکی دەرەکی لە عێراق ڕەتدەکەینەوە و هەر دەستوەردانێک دەبێتە نائارامی و گرفتی گەورە بۆ ناوچەکە”.
مستەفا کازمی، سەرۆکوەزیرانی عێراق لە پەیوەندییە تەلەفۆنییەکدا وتوویەتی، “ئێران یەکێکە لە دراوسێ باش و دۆستەکانی عێراق و پڕۆژەمان هەیە کە پەیوەندی ئابوری و بازرگانی نێوانمان لەگەڵ ئێران قوڵتر بکەینەوە بە تایبەت دوای تەواوبوونی ڕێگەی ئاسنی نێوان شەڵەمچە – بەسرە”.
سەرۆککۆماری ئێران بە کازمی ڕاگەیاندووە، ” بەداخەوە تا ئێستا ملیاردها دۆلاری ئێران کە لە عێراق بلۆک کراوە ئازاد نەکراوە و داوا لە بەرپرسانی پەیوەست بەو کێشەیە دەکەین لە عێراق هەوڵی زیاتریان هەبێت”.
مستەفا کازمی، سەرۆکوەزیرانی عێراق ئاشکرایکردووە، ” لیژنەیەک لە نێوان هەردوو وڵاتدا دروستکراوە بۆ چاودێری ترانزێتی کاڵا و پێداویستی بازرگانی لە نێوان عێراق و ئێراندا”.