2021-03-15   513     
وەزارەتی دەرەوەی ئێران رایگەیاند، پێشنیازێکیان ئاڕاستەی ئەنجومەنی وەزیرانی وڵاتەکەیان کردوە و داوایانکردوە ڤیزا لەنێوان عێراق و ئێران نەمێنێت و بڕیاریشە دوای تاوتوێکردنی پێشنیازەکە لەلایەن لیژنەی سیاسی و بەرگرییەوە دەنگی لەسەر بدرێت.
ئاوێنە: ئەنجومەنی وەزیرانی ئێران لەراگەیەنراوێکدا بڵاویکردەوە، "وەزارەتی دەرەوە پێشنیازێکی پێشکەشکردوە بۆ هەڵوەشاندنەوەی ڤیزا لەنێوان عێراق و ئێران، دوای ئەوەی لێکتێگەیشتن لەنێوان هەردولا لەسەر ئەم بابەتە دروستبوە".
ئاماژەی بەوەشکردوە، پێشنیازەکە خراوەتە بەردەم لیژنەی سیاسی و بەرگری لە ئەنجومەنی وەزیران بۆ ئەوەی بۆچونی خۆی لەبارەوە بدات و بخرێتە بەرنامەی کۆبونەوەکانی داهاتوی حکومەت.
پرسی هەڵگرتنی ڤیزا لەنێوان عێراق و ئێران ماوەی دو ساڵە گفتوگۆی لەسەر دەکرێت و هۆکارەکەشی بۆ بەرژەوەندی هەردو وڵات و زیاترکردنی جوڵەی گەشتیاری و بارزگانی دەگەڕێندرێتەوە، بەتایبەت هاتوچۆی گەشتیاران و هاوڵاتیانی نێوان هەردو وڵات ساڵانە بۆ ملیۆنان کەس بەرزبوەتەوە.