2021-03-18 424
سەرۆک وەزیرانی عێراق رایگەیاند، داوایان لە وەزارەتی دەرەوە کردوە دەستوەردان بکات بۆ فشارخستنەسەر کۆمپانیاکانی تایبەت بە دروستکردنی ڤاکسینی کۆرۆنا، بۆ ئەوەی پشکی عێراق لە ڤاکسینەکان گەرەنتی بکرێت.
ئاوێنه: ئەمیندارییەتی گشتی ئەنجومەنی وەزیران بڵاویکردەوە، مستەفا کازمی سەرۆک وەزیرانی عێراق داوای لە وەزارەتی دەرەوە کردوە لەرێگەی پەیوەندیکردن بە رێکخراوی نەتەوە یەکگرتوەکان و رێکخراوە تەندروستییەکان، فشار بکات بۆ گەرەنتیکردنی پشکی عێراق لەڤاکسینی کۆرۆنا.
ئەوەش هاتوە، سەرۆک وەزیران داوایکردوە وەزارەتی دەرەوە لەرێگەی کەناڵە سیاسی و دیپلۆماسییەکانەوە گفتوگۆ بکات لەگەڵ کۆمپانیاکانی تایبەت بە دروستکردنی ڤاکسینی کۆرۆنا و دەستبەرکردنی ئەو پێکوتەیە بۆ عێراق.
ئەوەش هاتوە، وەزارەتی دەرەوە راسپێردراوە لەگەڵ رێکخراوی نەتەوە یەکگرتوەکان و رێکخراوە تەندروستییەکان گفتوگۆ بکات و لەزوترین ماوەدا پشکی عێراق لە جۆرەکانی ڤاکسین دەستەبەر بکرێت.