بەرپرسێكی خانەنشینی: چاکسازیی خانەنشینیی بەڕێوەبەرە گشتییەکان تەواو بو
  2021-04-02       701       

بەڕێوەبەری ئامار لە خانەنشینیی ھەرێمی کوردستان رایده‌گه‌یه‌نێت، چاکسازیی خانەنشینیی پلەباڵاکان بەردەوامە و ئێستا گەیشتونەتە چاکسازیی لیستی ناوی راوێژکاران و ھەر توێژێك تەواو دەکەن بۆ ئەنجومەنی وەزیرانی بەرز دەکەنەوە و ئەوان بڕیاری لێ دەدەن.

ئاوێنە: سەباح موخلیس، بەڕێوەبەری ئامار لە خانەنشینیی ھەرێمی کوردستان به‌ ماڵپەڕی فەرمی پارتی راگه‌یاند''چاکسازیی خانەنشینیی پلەباڵاکان بەردەوامە و ئێستا بەڕێوەبەرە گشتییەکان تەواو بون کە نزیکەی 750 کەس بون و ناوەکان بۆ ئەنجومەنی وەزیران بەرز دەکەینەوە و بۆیان رون دەکەینەوە چەندیان نایاسایین و ئەوان بڕیاریان لێ دەدەن".

سەباح موخلیس وتیشی: "دەست بە چاکسازیی خانەنشینیی راوێژکاران دەکەین، چونکە تا ئێستا سێ چینمان تەواو کردوە، ئەویش دادوەران و بەڕێوەبەرانی گشتی و شارەزاکانن و ئێستاش لە قۆناغی چاکسازیی راوێژکارانداین".

موخلیس باسی لەوەش کرد: "دوای ئەوە دەست بە چاکسازیی ناوی بریکاری وەزیر و وەزیرەکان و ئەندامانی پەرلەمان و جێگری سەرۆکی پەرلەمان و سەرۆکی پەرلەمان و هەموو پلەباڵاکان دەکەین".

وتیشی: "ئەوەی بەرێوەبەرە گشتییەکان کاتی خۆی 80% موچەیان وەردەگرت، ئێستا دوای ھەموارکردنەوە 60%ی موچەیان پێ دەدرێت".

باسی لەوەش کرد: "چاکسازیی لیستی ناوی پلەباڵاکان بەردەوام دەبێت تا چاکسازی بۆ هەمویان دەکرێت".


زۆرترین بینراو
© 2021 Awene Online, Inc. All Rights Reserved.
×