"یاری بە تەندەرو نرخی گواستنەوەی نەوتی حەسیرە كراوە"
  2021-04-03       346       

دابان محەمەد، پەرلەمانتاری گۆڕان لە پەرلەمانی كوردستان رایگەیاند، وەزارەتی سامانە سروشتییەكان و ئەنجومەنی وەزیران یارییان بە تەندەرو نرخی گواستنەوەی نەوتی حەسیرە لە گەرمیان كردوە.

ئاوێنە: دابان محەمەد، ئەمڕۆ شەممە، لە راگەیەندراوێكدا ئەوەی خستۆتەڕو"لە دواى ئەوەى ماوەى یاسایى ئەو کۆمپانیایە تەواوبو کە کارى گواستنەوەى نەوتى حەسیرەى دەکرد، هەوڵێک هەبو، بە نهێنى و دور لە شەفافیەت و کێبڕکێ، پرۆسەکە ڕاستەوخۆ بدرێتەوە بە کۆمپانیاى پێشتر، کە دو ساڵى ڕابردو بە ڕێککەوتن کارى کردوەو  قازانجێکى زۆرى کردبو."

ئاماژەی بەوەشداوە كە "داوامانکرد لە پرۆسەیەکى ڕون و بەشێوەى تەندەر ئەم پرسە یەکلابکرێتەوە، گواستنەوەى یەک تەن نەوتى حەسیرە بۆ بۆرى کوردستان بەشێوەى تەندەر لە 27 دۆلارەوە کەمکرایەوە بۆ 16.90 دۆلار.

بەپێی قسەی ئەو پەرلەمانتارە "لە ڕێگەى جێگرى سەرۆکى حکومەتى هەرێم قوباد تاڵەبانى، کارکردن بەم تەندەرە ڕاگیرا، بە نایاسایى و دوو لە کێبڕکێ ئەم پرۆسەیە بە نرخێکى زیاتر درایەوە بە کۆمپانیاى پێشتر کە کۆمپانیاى بلاک پوڵە، بۆ ئەمەش یارى و دەستکارى ژمارەى تەندەرەکان و نرخى گواستنەوەى کۆمپانیاکە کراوە، ڕاستەوخۆ و ناڕاستەوخۆ قسە لەگەڵ کۆمپانیاكان كرا لە کێبەرکێدا بکشێنەوە."

هەروەها هێمای بۆ ئەوە كردوە كە "ئیدارەى گشتیش لە ڕێگەى (ش. ا.)، دەستێوەردانى لە پرۆسەکەدا کردوە، ئێستا کۆمپانیاى سێیەم کە لە پرۆسەى تەندەریندا نەبوە، هاتوەتە بەرباس، لە کاتێکدا کۆمپانیاى گازپرۆم بە گوێرەى ئەو ئیمەیڵانەى بۆ حکومەت و وەزارەتى سامانە سروشتیەکان و کۆمپانیاکانى ناردوە، ڕیزبەندى سێ کۆمپانیاى کردوە (ا ، ب ، ج )، بەپێى ئەو ڕیزبەندییە، هەر کۆمپانیایەک لەوانە نەیتوانى کۆمپانیاى دواتر دەتوانێت کارەکە بکات."

دابان محەمەد بە پێویستی زانیوە ئەم پرسە بگەڕێتەوە سەر ڕێرەوى خۆى و بەشێوەى ڕون و شەفاف بەڕێوەبچێت، ئەگەر نا با حکومەتى هەرێم خۆى کارەکە بکات.

هەروەها وتوشیەتی"کۆى ئەم پرسە، ئەنجومەنى وەزیران بە پلەى یەکەم و سەرۆکى حکومەت بە تایبەتى دەخاتە بەردەم پرسیار و بەرپرسیارێتیەوە، کە چۆن بەناوى ئەنجومەنى باڵاى هەرێمى نەوت و گاز و وەزارەتى سامانە سروشتیەکانەوە، تەلاعوب بە تەندەرەکانى گواستنەوەوە دەکرێت."

کێڵگەى حەسیرە بریتیە لە پێنج بیرى نەوت، ڕۆژانە 33 هەزار بەرمیل نەوت دەردەهێنرێت و لە ڕێگەى  1300 تانکەر دەگوێزرێتەوە بۆ خورمەڵە، بەقسەی دابان محەمەد "لەم چوار ڕۆژەدا، زیاتر لە 130 هەزار بەرمیل نەوت زیان بە پرۆسەى هەناردەکردن گەیشتوە."

زۆرترین بینراو
© 2021 Awene Online, Inc. All Rights Reserved.
×