وتەبێژی فەرمی جێگری سەرۆكوەزیرانی هەرێمی كوردستان ڕایدەگەیێنێت ، چاوەڕوانی ئەوەن سەرۆككۆماری عێراق واژۆ لەسەر بودجە بكات و بخرێتە بواری جێبەجێكردنەوە، دەشڵێت، “دەبێت حكومەت بڕیار لەبارەی لێبڕینی مووچەوە بدات، ئەگەر داهاتی هەرێم بگاتە 895 ملیار مووچە بەبێ لێبڕین دەدرێت”.

سەمیر هەورامی، وتەبێژی فەرمی جێگری سەرۆكوەزیرانی هەرێمی كوردستان لە لێدوانێكیدا ڕایگەیاندووە، حكومەتی هەرێم مانگانە پێویستی بە 895 ملیار دینارە بۆ ئەوەی مووچەی مووچەخۆران بە تەواوی بدات .

رایگەیاندووە، لەئێستادا چاوەڕێین حكومەتی عێراقین بزانن چەندێك بەر هەرێمی كوردستان دەكەوێت، ئەم مانگە وەكو تاقیكردنەوە وایە، ئەگەر بە داهاتی نانەوتییەوە كە 50٪ـی لای حكومەتی هەرێمی كوردستانە، داهات گەیشتە 895 ملیار دینار، ئەوا 100٪ مووچە بەبێ لێبڕین دابەش دەكرێت.

سەمیر هەورامی بۆ ڕووداو ئاماژەی بۆ ئەوەشكردووە، كە ڕەنگە پێویست بكات شاندێكی دیكەی هەرێمی كوردستان بچن بۆ بەغدا بۆ ئەوەی رێكارەكانی چۆنییەتی جێبەجێكردنی یاساكە دابڕێژنەوە.

ئەمە لەكاتێكدایە ، بڕیارە ڕۆژی سێشەممە 5ی نیسانی 2021 بودجەی گشتی ئەمساڵی عیراق ڕەوانەی سەرۆكایەتی كۆمار بكرێت بۆ واژۆكردنی دواتر بخرێتە بواری جێبەجێكردنەوە.