پێشەوا هەورامی وتەبێژی فراكسیۆنی پارتی لەپەرلەمانی كوردستان دەڵێت: تەقەكردن لە بارەگاكانی پارتی لە سلێمانی بووەتە دیاردە و زیاتر لە 70 جار دوبارە بوەتەوە، ئەوانەشی ئەو كارە دەكەن ناسنامەی حزبیان پێیە.
ئاوێنه: پێشەوا هەورامی لەكۆنگرەیەكی ڕۆژنامەوانیدا لەشاری سلێمانی وتی: وەكو شاندێكی فراكسیۆنی پارتی هاتون لەگەڵ بەرپرسانی سلێمانی لەهۆكاری تەقەكردن لەبارەگاكانی پارتی لەو پارێزگایە بكۆڵنەوە، تەقەكردن لەبارەگاكانی پارتی لە سنوری سلێمانیدا بوە بە دیاردە و هەر كەس بیەوێت تەقە لە بارەگاكانی پارتی بكات بە ئاسانی دەتوانێت ئەو كارە بكات.
رونیشیكردوەتەوە: ئەوانەی لەسەر تەقەكردن لە بارەگاكانی پارتی لە سلێمانی دەستگیركراون پێناسی حزبیان پێبوە و تەنها لە ماوەی رابردودا 26 جار تەقە لە بارەگای ئەنجومەنی سەركردایەتی پارتی لە سلێمانی و هەڵەبجە كراوە.
وتەبێژی فراكسیۆنی پارتی ئەوەشی ئاشكراكرد، ئەوان وێنەو ناوی تۆمەتبارەكانیان پێیە و دەیدەنە دەزگا ئەمنیەكانی سلێمانی بۆ ئەوەی بەدواداچون بكەن و سەرجەم ئامارو وردەكاریەكان دەبەنە پەرلەمانی و كاری لەسەر دەكەن.