وەزیری تەندروستیی حكومەتی هەرێمی كوردستان ئاشكرای دەكات، لەلایەن سەرۆكایەتیی ئەنجومەنی وەزیرانەوە، رەزامەندی دراوە كە نەخۆشخانەیەكی فریاكەوتن بۆ قەزای بەردەڕەش دروست بكرێت، دەشڵێت، هەفتەی داهاتوو بڕێكی تری ڤاكسین دەگاتە عیراق و هەرێمی كوردستان.

ئاوێنە: د. سامان بەرزنجی، وه‌زیری ته‌ندروستی حكومه‌تی هه‌رێمی كوردستان به‌ ماڵپەڕی فەرمیی پارتی راگەیاند: "پێشتر لەلایەن سەرۆكایەتیی ئەنجومەنی وەزیرانەوە رەزامەندی دراوە كە نەخۆشخانەیەكی فریاكەوتنی تایبەت بۆ قەزای بەردەڕەش دروست بكرێت، بەڵام بەداخەوە راستەوخۆ كەوتینە ناو قەیرانی داراییەوە، ئێستاش پرۆژەكە ماوە و شوێنی بۆ تەرخان كراوە و تەنها ماوە پارەكەی بۆ تەرخان بكرێت، لە پڕۆژە ‌بودجەی هەرێمی كوردستانیشدا، دروستكردنی نەخۆشخانەی فریاكەوتنی بەردەڕەش، لە پرۆژە هەرە لەپێشەكان دانراوە".

وتیشی: "ژمارەیەك كەموكورتیی تر لە سنووری قەزای بەردەڕەش هەن و دەمانەوێت چارەسەریان بكەین و لەگەڵ پەسەندكردنی بودجەشدا، ئومێدێك هەیە رەوشی ئابووری بەرەو باشتر دەچێت، بۆیە دەمانەوێت نەخۆشخانەی فریاكەوتن بۆ قەزاكە دروست بكرێت".

سەبارەت بە گەیشتنی وەجبەیەكی تری ڤاكسین بۆ هەرێمی كوردستان، د. سامان وتی: "هەفتەی داهاتوو بڕێكی تری ڤاكسین دەگاتە عیراق و هەرێمی كوردستان و، بڕەكەش بەپێی كاروانەكە دەبێت، كە چەند بەر هەرێمی كوردستان دەكەو‌ێت".

روونیشیكرده‌وه‌: "بەر لە 10ی ئەم مانگە، لیژنەی باڵای رووبەڕووبوونەوەی ڤایرۆسی كۆرۆنا لە هەرێمی كوردستان، لەبارەی رەوشی ئێستاوە كۆدەبێتەوە".

وەزیری تەندروستیی حكوومەتی هەرێمی كوردستان وتیشی: "داوا لە هاووڵاتیانی خۆشەویست دەكەین، بە تایبەت ئەوانەی بەتەمەنن لە ‌60 ساڵ بۆ سەرەوە، یاخود نەخۆشیی درێژخایەنیان هەیە لەگەڵ هێزە ئەمنییەكان و براپێشمەرگەكان و بەساڵداچووان و مامۆستایانی خۆشەویستی پۆلی 12 ئامادەیی، بێن پێكوتەی دژ بە ڤاكسینی كۆرۆنا وەربگرن".