سبەی لیژنەی بینینی مانگ كۆ دەبنەوە و بڕیار لە دیاریکردنی یەكەم ڕۆژی مانگی ڕەمەزان دەدرێت
  2021-04-10       227       
وەزارەتی ئەوقاف و کاروباری ئایینی هەرێمی کوردستان ئاشکرای دەکات، سبەی ئێوارە لیژنەی بینینی مانگ لە سەرجەم پارێزگا و ئیدارەكانی هەرێمی کوردستان كۆ دەبنەوە و بڕیار لە دیاریکردنی یەكەم ڕۆژی مانگی ڕەمەزان دەدرێ.

ئاوێنه‌: نەبەز ئیسماعیل، وتەبێژی وەزارەتی ئەوقاف و کاروباری ئایینی هەرێمی کوردستان  ڕاگەیاند: "سبەی ئێوارە لیژنەی بینینی مانگ لە سەرجەم پارێزگا و ئیدارەكانی هەرێمی کوردستان كۆدەبنەوە و بە هەماهەنگی لەگەڵ دیوانی وەقفی سوننەی عیراق، بڕیار لە یەكەم ڕۆژی مانگی ڕەمەزانی پیرۆز دەدرێت".

ئاماژەی بەوەش دا: لە كۆتاڕۆژی مانگی شەعبان لیژنەكە كۆدەبێتەوە و چاودێری بینینی مانگ دەكات و ئەوان بڕیار لەسەر دیاریكردنی یەكەم ڕۆژی مانگی ڕەمەزان دەدەن "ھیچ کەسێک  نابێ دەست لە کاروباری لیژنەی باڵای بینینی مانگ وه‌ربدات، کە دەسەڵاتی دیاریکردنی یه‌كه‌م رۆژی مانگی رەمەزانی ھەیە".

نەبەز ئیسماعیل وتیشی: ئەو خشتە و پێشبینییه‌ فەلەكییانەی لە هەرێمی کوردستان بۆ دیاریكردنی مانگی كۆچی و ڕەمەزان و جەژن بڵاو دەكرێنەوە، كاریان پێ‌ ناكرێت، بەڵكوو لە کوردستان پشت بە بڕیاری لیژنەی بینینی مانگ دەبەسترێت، كە ساڵانە لەلایەن وەزارەتەوە پێك دەهێنرێت".

ڕوونیشی کردەوە: وەزارەتی ئەوقاف و لیژنەی بینینی مانگ و ئەنجوومەنی باڵای فەتوای هەرێمی کوردستان، ڕێكاری پێویست بۆ  دیاریکردنی یەکەم ڕۆژی  ڕەمەزان دەگرنەبەر.
زۆرترین بینراو
© 2021 Awene Online, Inc. All Rights Reserved.
×