به‌رهه‌م ساڵح له‌گه‌ڵ نێچیرڤان بارزانی كۆبوه‌وه‌
  2021-04-10       203       
به‌رهه‌م  ساڵح سه‌رۆك كۆماری عێراق له‌دیدارێكدا له‌گه‌ڵ سه‌رۆكی هه‌رێمی كوردستان جه‌ختیكرده‌وه‌، پێویسته‌ بودجه‌ له‌پێناو دابینكردنی خۆشگوزه‌رانی ھاوڵاتیان و چاره‌سه‌ركردنی كێشه‌كانی بژێوی ژیان و موچه‌ جێبه‌جێبكرێت.

ئاوێنه‌: ئه‌مڕۆ شه‌ممه‌ له‌ كۆشكی سه‌لام له‌ به‌غدا د. به‌رهه‌م ساڵح، سه‌رۆك كۆماری عێراق پێشوازیكرد له‌ نێچیرڤان بارزانی، سه‌رۆكی هه‌رێمی كوردستان و سه‌باره‌ت به‌ دۆخی سیاسی عێراق و هه‌رێمی كوردستان و دواپێشهات و گۆرانكارییه‌كانی ناوچه‌كه‌ گفتوگۆیان كرد.

له‌و كۆبونه‌وه‌یه‌دا سه‌باره‌ت به‌ هه‌لومه‌رجی سیاسی عێراق و دوا پێشهاته‌ سیاسییه‌كان گفتوگۆكرا، به‌تایبه‌ت ئه‌نجامدانی هه‌ڵبژاردنی پێشوه‌خته‌ی ئه‌نجومه‌نی نوێنه‌رانی عێراق، له‌م روه‌وه‌ دوپاتكرایه‌وه‌ كه‌ پێویسته‌ زه‌مینه‌ی هه‌ڵبژاردنێكی پاك و بێگه‌رد بڕه‌خسێت كه‌ گوزارشتی راسته‌قینه‌ی ئیراده‌ی ده‌نگده‌ران بێت له‌پێناو تێپه‌ڕاندنی قه‌یران و ناكۆكییه‌كانی ئێستا و زامنكردنی سه‌قامگیری و ئارامی له‌ داهاتودا.

هه‌ر له‌و كۆبونه‌وه‌یه‌دا به‌گرنگییه‌وه‌ باس له‌ په‌سه‌ندكردنی یاسای بودجه‌ی عێراق بۆ ساڵی 2021 و چه‌سپاندنی پشكی هه‌رێم كرا، ته‌ئكیدیشكرایه‌وه‌ كه‌ پێویسته‌ بودجه‌ له‌پێناو دابینكردنی خۆشگوزه‌رانی ھاوڵاتیان و چاره‌سه‌ركردنی كێشه‌كانی بژێوی ژیان و موچه‌ جێبه‌جێبكرێت، هاوكات ئاماژه‌ به‌وه‌درا كه‌ پێویسته‌ ئه‌مه‌ سه‌ره‌تای گفتوگۆیه‌كی بونیاتنه‌رانه‌ بێت بۆ چاره‌سه‌ری سه‌رجه‌م كێشه‌كانی نێوان و حكومه‌تی فیدراڵ و هه‌رێم به‌گوێره‌ی ده‌ستور.

له‌ ته‌وه‌رێكی تری كۆبونه‌وه‌كه‌دا گفتوگۆ له‌باره‌ی دواپێشهات و گۆڕانكارییه‌كانی ناوچه‌كه‌ به‌گشتی كرا، له‌م روه‌وه‌ ته‌ئكید له‌ یه‌كخستنی هێز و تواناكان و نزیكردنه‌وه‌ی بیروبۆچونی هێز و لایه‌نه‌ ناكۆكه‌كان كرایه‌وه‌، به‌ مه‌به‌ستی تێپه‌ڕاندنی هه‌ڕه‌شه‌ و مه‌ترسییه‌كان.

زۆرترین بینراو
© 2021 Awene Online, Inc. All Rights Reserved.
×