وەزارەتی كشتوكاڵ تاوتوێی ئەگەری وشكەساڵی دەكات
  2021-04-12       174       

وەزارەتی كشتوكاڵ و سەرچاوەكانی ئاوی حكومەتی هەرێم، ئەمڕۆ دوشەممە، تاوتوێی ئەگەری وشكەساڵی و هەنگاوەكانی روبەڕوبونەوەی ئەو دیاردەیەی لە هەندێك ناوچەی هەرێمی كوردستان، كرد.

ئاوێنە: بەپێی راگەیەندراوێكی وەزارەتەكە، ئەمڕۆ بەسەرپەرشتی بێگەرد تاڵەبانی، وەزیری کشتوکاڵ و سەرچاوەکانی ئاو بە ئامادەبونی بریکار و ئەندامانی ئەنجومەنی راوێژکاری کۆبونەوەیەکی گرنگ ئەنجامدراوە، بۆ مەبەستی دیراسەو تاوتوێکردنی ئەگەری وشکەساڵی و هەنگاوەکانی ڕوبەڕوبونەوەی ئەم دیاردەیە لە هەندێ ناوچەی هەرێمی کوردستان، بە میوانداری چەند کەسێکی ئەکادیمی لە بواری کشتوکاڵ و بەڕێوەبردنی سەرچاوەکانی ئاو.

بەگوێرەی راگەیەندراوەكە، دوابەدوای گفتوگۆ و خستەڕوی سەرجەم سەرنج و پێشنیار و ڕێگەچارەکان لە لایەن بەڕێوەبەرایەتی گشتی کشتوکاڵی پارێزگاکان و فەرمانگەکانی وەزارەت، لێژنەیەک راسپێردرا بۆ ئامادەکردنی گەڵاڵەنامەی پێشنیارەکان و کۆکردنەوەو یەکخستنی سەرجەم پێشنیارو رێکاری پێویستی وەزارەتی کشتوکاڵ و سەرچاوەکانی ئاو بۆ بەردیدی کۆبونەوەی ڕۆژی چوارشەممەی سەرۆکایەتی ئەنجومەنی وەزیران بۆ مەبەستی بڕیاردان لەسەر پرسی وشکەساڵی و بەرنامە و پلان و هەنگاوەکانی ڕوبەڕوبونەوەی حکومەتی هەرێمی کوردستان.


زۆرترین بینراو
© 2021 Awene Online, Inc. All Rights Reserved.
×