وتەبێژی حكومەتی هەرێمی كوردستان ڕایدەگەیەنێت، هەموو ئەو دەنگۆیانەی باس لە بۆردومانكردنی بنكەیەكی ناوەندی زانیاری و چالاكی دەزگایەكی هەوالگریی ئیسرائیلی لە هەرێمی كوردستان دەكەن دوورە لە ڕاستییەوە.

جوتیار عادل وتەبێژی حكومەتی هەرێمی كوردستان لە ڕاگەیەنراوێكدا ئاماژە بۆ ئەوە دەكات، ژمارەیەك میدیای ناوچەكە، هەواڵێكیان بڵاوكردووەتەوە كە گوایە بنكەیەكی ناوەندی زانیاری و چالاكی دەزگایەكی هەواڵگری ئیسرائیلی لە هەرێمی كوردستان كراوەتە ئامانج و چەند كارمەندێكی ئەو بنكەیە كوژراون و بریندار بوون.

وتیشی”ئێمە لێرەوە ڕایدەگەیێنین ئەو هەواڵە سەرلەبەری دوورە لە ڕاستییەوە، هەروەك چۆن لە ڕابردووشدا چەندینجار ئەو جۆرە تۆمەتانەیان ئاڕاستە كردووین بەوەی بنكەیەكی دەزگای هەواڵگری ئیسرائیل لە كوردستانە”.

جەختی لەوەش كردەوە، پێمانوایە ئەو هەواڵ و تۆمەتە بێ بنەمایانە مەبەستدارە و تەنیا ئامانجیان پیلانگێڕییە بەرامبەر بە هەرێمەكەمان.

ئەمەش لەكاتێكدایە، تۆڕی (RT) ڕووسی بڵاویكردەوە، هێزە ئاسمانییەكانی ئێران بنكەیەكی هەواڵگری ئیسرائیلییان لە هەرێمی كوردستان بۆردومان كردووە.
ئاژانسە روسییەكە لە چەند سەرچاوەیەكەوە ئاماژە بۆ ئەوە دەكات، بەهۆی بۆردومانەكەوە چەند سەربازێكی ئیسرائیلی كوژراو و بریندار بوون.
سەرچاوەكان ئاشكراشیدەكەن، بۆردومانەكەی موساد لە هەرێمی كوردستان گورزێكی نوێیە لە ئیسرائیل دراوە.
هاوكات ماڵپەڕی تایبەت بە چاودێریكردنی جوڵەی فڕۆكە و كەیسی سەربازی و مەدەنی، بۆردومانەكەی ئێران دژی ئیسرائیلی پشت ڕاست كردووەتەوە و ئاماژە بۆ ئەوە دەكات، لە ماوەیەكی نزیكدا وێنەكان بڵاودەكەینەوە.

هاوكات میدیاكانی ئێران بڵاویان كردەوە، دوێنی سێ شەممە هێزە ئاسمانییەكانی ئێران مووشەكێكیان ئاڕاستەی كەشتییەكی ئیسرائیل كردووە كە كاری گواستنەوەی ئۆتۆمبێل بووە، بەلام میدیاكانی ئیسرائیل ئاشكرایانكرد، موشەكەكە هیچ زیانێكی نەبووە و كەشتییەكە لەسەر رێڕەوی خۆی بەردەوام بووە.
ئەمەش لەكاتێكدایە ئیسرائیل هێرشێكی بۆسەر دامەزراوەی “نەتنز”ی ئێرانی ئەنجامداوە و دوای ڕووداوەكەش، ئێران بە فەرمی ئیسرائیلی بە ئەنجامدانی ئەو هێرشە تۆمەتبار كرد و هەڕەشەی وەڵامدانەوەی كرد.

كۆشكی سپی ئەمریكا ڕایگەیاند، ئەوان بەشدار نەبوون لەو هێرشەدا.