بافڵ تاڵەبانی لە ساڵیادی كۆچی دوایی “سەید عەبدولعەزیز ئەلحەكیم” پەیامێكی بڵاوكردەوە
  2021-04-17       227       

لە ساڵیادی كۆچی دوایی “سەید عەبدولعەزیز ئەلحەکیم”، بافڵ تاڵەبانی ڕایگەیاندووە، “بە ڕێز و شکۆوە یادی تێکۆشەر و دۆستێکی دێرین و نزیکی گەلی کورد و سەرۆک مام جەلال دەکەینەوە”.

ئاوێنه‌: لە پەیامێكدا، بافڵ تاڵەبانی، هاوسەرۆكی یەكێتیی نیشتمانیی كوردستان ڕایگەیاندووە، “ئەمڕۆ ساڵیادی کۆچی دوایی سەماحەتی سەید عەبدولعەزیز ئەلحەکیم، سەرکردەی دیاری عێراقە”.

ئەوەشی وتووە، “بە ڕێز و شکۆوە یادی تێکۆشەر و دۆستێکی دێرین و نزیکی گەلی کورد و سەرۆک مام جەلال دەکەینەوە کە بەدرێژایی ژیانی خەبات و تێکۆشانی دژی دیکتاتۆری و زوڵم و ستەم کردووە و هەمیشە لە بەرەی داکۆکیکردنیش بووە لە بەدیھێنانی مافەکانی گەلی کورد”.

“لە ڕۆژانی سەختی خەباتیشدا ھاوپشت و پشتیوانیی خەباتی نەتەوایەتیمان بوو”، وەك بافڵ تاڵەبانی ئاماژەی پێكردووە.

ئەوەشی ڕاگەیاندووە، “ئەمڕۆ کە یادی ئەم سەرکردە قارەمان و مەزنە دەکەینەوە، لە ھەمووکات زیاتر پێویستمان بە ھەمان ڕۆحیەتی خوالێخۆشبوو سەماحەتیان ھەیە بۆ لێکنزیکبوونەوەی زیاتر و دووبارە بووژاندنەوەی گیانی پێکەوەبوون و بونیادنانەوەی متمانە لەنێوان ھێزە شۆڕشگێرەکانی ھەرێم و عێراق بۆ پاراستنی دەستوور و بەھا باڵاکانی گەلی کورد و عێراق”.

هاوسەرۆكی یەكێتی ئەوەشی خستوەتەڕوو، “دڵنیام سەماحەتی سەید عەمار ئەلحەکیم درێژەپێدەری ھەمان ڕێچکە و بیروباوەڕی بەڕێزیانە و پێکەوە دەستلەناودەست دەبین لەپێناو سەقامگیری زیاتری سیاسی، ئەمنی و ئابوری”.

زۆرترین بینراو
© 2021 Awene Online, Inc. All Rights Reserved.
×