2021-04-26 493
هێزەکانی ئاسایش لە شەوی ڕابردووەوە ڕۆژنامەنووس ‘ڕێباز حەسەن’یان لە شاری سلێمانی دەستگیرکردووە و تائێستاش ئازاد نەکراوە.
ئاوێنه: شەوی ڕابردوو ‘ڕێباز حەسەن’ بەمەبەستی ڕووماڵکردنی ڕێپێوانێک دژ بە هێرشە داگیرکارییەکانی دەوڵەتی تورک چووەتە شەقامی سەهۆڵەکەی سلێمانی، بەڵام لەلایەن هێزەکانی ئاسایشەوە دەستگیرکراوە.
تاوەکو ئێستا ئازاد نەکراوە و هیچ زانیارییەک لەبارەی شوێنی ڕاگرتنی و هۆکاری دەستگیرکردنەکەیەوە نییە.
ئەمە لەکاتێکدایە بڕیاربوو شەوی ڕابردوو لە شەقامی سەهۆڵەکەی سلێمانی ڕێپێوانێک دژ بە هێرشە داگیرکارییەکانی دەوڵەتی تورک بەڕێوەبچێت، بەڵام ئاسایشی سلێمانی ڕێگەی بە ڕێپێوانەکە نەدا و نزیکەی ٣٠ کەسیشی لە هاوڵاتیان و ئەندامانی تەڤگەری ئازادیی دەستگیر کرد، ڕیباز حەسەنیش وەک تاکە ڕۆژنامەنووس، لەناو دەستگیرکراوەکاندایە.
نەریمان ئەحمەد، ئەندامی دەستەی هاوسەرۆکایەتیی تەڤگەری ئازادیی بە ڕۆژنیوزی ڕاگەیاند: بەرپرسانی ئاسایش دەڵێن لەسەرووی خۆیانەوە فەرمانیان پێکراوە ڕێگریی بکەن لە ڕێپێوانەکە.
هاوکات جەختیشی کردەوە لەوەی کە دەبێت بەزووترین کات دەستگیرکراوەکان ئازادبێن و ڕایگەیاند: ئەگەر ئەو کەسانە ئازاد نەکرێن ئەوا شەقام چۆڵ ناکەین و بەردەوام دەبین لە چالاکییەکانمان.