لەسلێمانی ژمارەیەك دوكانی دروستكردنی شەربەت داخران، خۆپاراستنی تەندروستیش دەڵێت:شەربەتەكانیان مەرجە تەندروستیەكانیان تێدا نیەو شیاوی بەكارهێنان نین.
ئاوێنه: بەڕێوەبەرایەتی خۆپاراستنی تەندروستی سلێمانی لە راگەیەنراوێكیدا دەڵێت: دوابەدوای ئەو پشكنینە چڕانەی تیمەكانی چاودێری تەندروستی، لەبەڕێوەبەرایەتیمان ئەنجامیاندا بۆ پشكنینی هەندێ دوكانی دروستكردنی شەربەت لەناو شاری سلێمانیداو وەرگرتنی نموونە لە شەربەتەكانیان بۆ پشكنین لە تاقیگەدا، لەئەنجامدا دەركەوت كە شەربەتەكانیان مەرجە تەندروستیەكانیان تێدا نیەو شیاوی بەكارهێنان نین.
خۆپاراستنی تەندروستی سلێمانی رونیشیكردوەتەوە: لەلایەن بەڕێوەبەرایەتی چاودێری تەندروستیەوە بڕیاردرا بەداخستنی 8 دوكانی شەربەت دروستكردن و دوكانێكی شیرینی، داواش لە هاووڵاتیان دەكەین لە هەرشوێنێك دیاردەی ناتەندروستیان بینی تیمەكانی چاودێری تەندروستی لێ ئاگاداربكەنەوە.