نەپەگە ڕایگەیاند ''ئەگەر دەوڵەتی داگیرکەری تورک لەم هێرشانەدا ئەنجامێک بەدەست نەهێنێت، دەسەڵاتی فاشیستیش بە تەواوەتی تێکدەشکێت و ڕژێمی ئەنقەرە هەڵدەوەشێتەوە، نەپەگە داواشی لە گەلی کورد کرد کە بە شێوەیەکی نەتەوەیی بەرخۆدان بکەن''.
ئاوێنه: ئەمڕۆ فەرماندەیی بڕیارگەی ناوەندی پاراستنی گەل- نەپەگە، ڕوو لە گەریلاکانی لە هەرێمەکانی پاراستنی مەدیا پەیامێکی بڵاوکردەوە.
لە ڕاگەیەندراوەکەی نەپەگە-دا هاتووە: چاوەڕێی هێرشی دەوڵەتی تورک بووین، نێوان ئێمە و دوژمن لە ئاستێکی بەرزدا دەبێتە گۆڕەپانی حەساب پرسینەوە.
هەروەها ئاماژەشی بەوەداوە کە ئەگەر دەوڵەتی تورک لە زاپ، مەتینا و ئاڤاشین ئەنجامێک بەدەست نەهێنێت، ئەمە دەبێتە تێکچوونی ئەنقەرە و هاتووە: ساڵی ٢٠٢١ بۆ دەسەڵاتی ئاکەپە-مەهەپە ساڵی شەڕی مان و نەمانە، ئەگەر سەربکەوێت دەمینێت و ئەگەر تێکیش بشکێت، نامینێت.
نەپەگە ڕاشیگەیاندووە: نامانەوێت تەنیا پاراستن بکەین، دەمانەوێت دوژمن تێکبشکێنین و سەرکەوتن مسۆگەر بکەین، بە شێوەیەکی نەتەوەیی لە بەرامبەر ئەم هێرشانە دەوەستینەوە و بەرخۆدانی نەتەوەیی دەکەین، نەتەوەکەمان پێویستی بەمەیە.
لە کۆتاییشدا داوای لە گەلی کورد کردووە کە بە شێوەیەکی نەتەوەیی بەرخۆدان بکەن.