ئەمڕۆ
پێنجشەممە، بەرهەم ساڵح، سەرۆك كۆماری عێراق و نێچیرڤان بارزانی، سەرۆكی هەرێمی
كوردستان لەكۆبونەوەیەكی نێوانیاندا جەختیان لە پێویستیی تێپەڕاندنی ناکۆکی و
ململانێکان و گفتوگۆو لێکگەیشتن لەنێوان لایەنە سیاسییەکاندا کردەوە.
ئاوێنە: پاشنیوەڕۆی
ئەمڕۆ پێنجشەممە، نێچیرڤان بارزانی، سەرۆکی هەرێمی کوردستان پێشوازی لە بەرهەم ساڵح،
سەرۆک کۆماری عێراق کرد.
بەپێی راگەیەندراوی كۆبونەوەكە كە جێگرانی سەرۆکی هەرێمی کوردستان و جێگری
سەرۆک وەزیرانی هەرێمی کوردستان ئامادەی بون، لە كۆبونەوەكەدا دوا گۆڕانکارییە سیاسییەکانی
عێراق و هەرێمی کوردستان تاوتوێ کران، بەتایبەتی هەڵبژاردنی پێشوەختەی ئەنجومەنی
نوێنەرانی عێراق و چۆنیەتیی زەمینەخۆشکردن لەبەردەم پرۆسەکەدا کە خزمەتی بەرژەوەندیی
هاوبەشی گەل و هەمو پێکهاتەکانی عێراق بە هەرێمی کوردستانیشەوە بکات.
لە کۆبونەوەکەدا
داکۆکی لە پێویستیی تێپەڕاندنی ناکۆکی و ململانێکان و گفتوگۆو لێکگەیشتن لەنێوان
لایەنە سیاسییەکاندا کرایەوەو بەگرنگییەوە باس لەدوایین سەردانی سەرۆکی هەرێمی
کوردستان بۆ بەغداو کۆبونەوەی لەگەڵ سەرکردەو لایەنە عیراقییەکان کرا.
لە تەوەرێکی دیکەی
کۆبونەوەکەدا گفتوگۆ دەربارەی هێنانەدی یەکڕیزیی نیشتمانی و لێکنزیککردنەوەی بیروبۆچونەکان
کرا بە ئاڕاستەی تێپەڕاندنی ناکۆکییەکان و یەکخستنی هێزو تواناکان بۆ ڕوبەڕوبونەوەی
ئەگەرو پێشهاتەکان.
تاوتوێکردنی دۆخی
ناوچەکە بەگشتی تەوەرێکی دیکەی کۆبونەوەکە بو، تیایدا جەخت لەوە کرایەوە کە ناسەقامگیریی
دۆخی سیاسی و ئەمنی، خزمەت بە بەرژەوەندیی هاوبەشی گەلانی ناوچەکە ناکات.