بانکی خوێنی هەڵەبجە ره‌تیده‌كاته‌وه‌ به‌ پاره‌ خوێنیان فرۆشتبێت و دەشڵێت: تا ئێستا هیچ بڕە پارەیەک لەبەرامبەر پێدانی خوێن بە نەخۆش وەرنەگیراوە، ئەگەرچی بەپێی رسوماتی حکومی لەبەرامبەر هەر خزمەتگوازییەکی تەندروستیدا بڕێک پارە بە شێوەی پسوڵە وەردەگیرێت.

ئاوێنە: بانكی خوێنی هه‌ڵه‌بجه لە رونكردنەوەیەكدا‌ "تۆمه‌ته‌كان"ی دكتۆرێكی به‌ ناوی "باخان" ره‌تكردەوە‌و رایگه‌یاند"لە بانکی خوێنەکانی دیكەی کوردستان لەبەرامبەر پێدانی یەک یەکەی خوێن بە نەخۆش بڕی 2.500 دینار بۆ نەخۆشخانە حکومیەکان و بڕی 16.000 دینار بۆ نەخۆشخانە ئەهلیەکان وەردەگیرێت".

ھەروەھا ھاتوە"لەبەر ئەوەی بانکی خوێنی هەڵەبجە تازەیە و پێشتر نەبوەو تا ئێستا رێنمایی تایبەت بە وەرگرتی ئەو رسوماتەمان بەدەست نەگەیشتوە و وەرگرتنی هەر پارەیەک لە دامەزراوە تەندروستییەکاندا دەبێت پاڵپشت بێت بە نوسراوی تەندروستی لەسەر بنەمای رێنمایی و بڕیاری وەزارەتی تەندروستی دەتوانرێت پارە وەربگیرێت".

بانکی خوێنی هەڵەبجە جەختیكردەوە "تەواوی خوێنبەخشانی شارەکە دڵنیا دەکەینەوە خوێنی بەخشراوی ئێوە بە ئەمانەتەوە دەگەیەنرێتە کەسوکارە نەخۆشەکانی خۆتان."