كۆمسیۆنی هەڵبژاردن دوا ئاماری حیزب و كاندیدە تۆماركراوەكانی ئاشكراكرد
  2021-04-30       241       


کۆمسیۆنی باڵای سەربەخۆی هەڵبژاردنەکانی عێراق لە دوا ئاماریدا ئاشکرای کرد، بۆ هەڵبژاردنی پێشوەختەی عێراق هەزار و ١١٦ کاندید خۆیان تۆمارکردوە و ٢٦٥ حزبیش مۆڵەتی کارکردنیان پێدراوە. هاوکات، "١ی ئایار کۆتایی بە وادەی خۆ تۆمارکردنی حزب و کاندیدەکان دێت."

ئاوێنە: جومانە غەلای وتەبێژی کۆمسیۆنی سەربەخۆی باڵای هەڵبژاردەنەکانی عێراق لە كۆنگرەیەكی رۆژنامەوانیدا رایگەیاند، رۆژی شەممە ١ی ئایار وادەی تۆمارکردنی حزب و هاوپەیمانێتی و کاندیدەکان کۆتایی دێت.

راشیگەیاند، تا ئێوارەی رۆژی پێنجشەممە هەزار و ١١٦ کاندید خۆیان تۆمارکردوە و لە ١ی ئایارەوە هیچ کاندیدێکی دیکە ناتوانێت خۆی تۆمار بکات.

بەگوێرەی دوایین ئاماری کۆمسیۆنی هەڵبژاردنەکان، ٢٦٥ حزب مۆڵەتی کارکردنیان پێدراوە و ٥١ حزبی دیکەش چاوەڕێن مۆڵەتیان پێبدرێت، هاوکات، ١٢٤ حزبیش بەنیازن بەشداری هەڵبژاردنی پێشوەختەی پەرلەمان بکەن.

هەر بەگوێرەی ئامارەکەی کۆمسیۆن، ٣٨ هاوپەیمانی سیاسی خۆیان تۆمارکردوە و مۆڵەتیان پێدراوە و پەسەند کراون و لەو ژمارەیەش ١٨ هاوپەیمانێتیان بەنیازن بەشداری هەڵبژاردنی پێشوەختە بکەن. لەکاتێکدا ١١ هاوپەیماێتی دیکە چاوەڕێن خۆیان تۆماربکەن.

زۆرترین بینراو
© 2021 Awene Online, Inc. All Rights Reserved.
×