ئەنجومەنی وەزیرانی هەرێمی كوردستان، ئەمڕۆ چوارشەممە، گفتوگۆی لەبارەی
پڕۆژەی ستراتیژیی نیشتمانیی ڕوبەڕوبونەوەی گەندەڵی كردو هەروەها پڕۆژە یاسای کۆمپانیا
ئەمنییە تایبەتەکانی لە هەرێمی کوردستان پەسەندكرد.
ئاوێنە: بەپێی راگەیەندراوێكی حكومەتی هەرێم، ئەمڕۆ ئەنجومەنی وەزیرانی هەرێمی
کوردستان بە سەرۆکایەتی مەسرور بارزانی سەرۆک وەزیرانی هەرێمی کوردستان و ئامادەبونی
قوباد تاڵەبانی جێگری سەرۆک وەزیران، کۆبونەوەی هەفتانەی ئەنجامدا.
لە بڕگەی یەکەمی کۆبونەوەکەدا، ڕەشنوسی پڕۆژەی ستراتیژیی نیشتمانیی ڕوبەڕوبونەوەی
گەندەڵی لە هەرێمی کوردستان، لە لایەن سەرۆکی دەستەی دەستپاکی لە هەرێمی کوردستان
خرایەڕو. ئەنجومەنی وەزیران جەختی لە ڕوبەڕوبونەوەو بنبڕکردنی گەندەڵی و بەهەدەردانی
سامانی گشتی کردەوە کە بەشێکی گرنگیی کارنامەی کابینەی نۆیەمی حکومەتی هەرێمی
کوردستانە.
ئینجا وەزیری پلاندانان دارا ڕەشید، ڕاپۆرتێکی لە بارەی داهات و خەرجییەکانی
حکومەتی هەرێم و ڕێکخستنەوەیان لە چوارچێوەی پڕۆژە یاسای بودجەی 2021 خستەڕو، ئەنجومەنی
وەزیران دوا ئامادەکارییەکانی ڕەشنوسی پڕۆژە یاسای بودجە کرد تاوتوێ کرد کە بڕیارە
لە کۆبونەوەکانی داهاتو، پڕۆژەکە بچێتە قۆناغی پەسەندکردن لە لایەن ئەنجومەنی وەزیران
بۆ ئەوەی بنێردرێتە پەرلەمانی کوردستان.
لە بڕگەی سێیەمی کۆبونەوەکەدا، ئەنجومەنی وەزیران پڕۆژە یاسای (کۆمپانیا ئەمنییە تایبەتەکان لە هەرێمی
کوردستان) پەسەندکرد.
لە کۆتایی کۆبونەوەکەدا، ئایدن مەعروف وەزیری هەرێم بۆ کاروباری پێکهاتەکان،
ڕاپۆرتێکی لە سەر ڕەوشی پێکهاتەکان و چالاکییەکانی وەزارەتی هەرێم بۆ کاروباری پێکهاتەکان
خستەڕو.