حاكم شێخ لەتیف، شارەزا لە یاسا داوا لە هەردو كونسوڵخانەی ئەمریكاو ئەڵمانیا لە هەولێر دەكات لەسەر بڕیاری سزادانی پێنج رۆژنامەنوس و چالاكوانی بادینان هەڵوێستیان هەبێت كە بەپێی بڕیارەكە ئەو دو كونسوڵخانەیە شوێنێكن بۆ كاری سیخوڕی و تێكدانی ئاسایشی هەرێمی كوردستان.

ئاوێنە: حاكم شێخ لەتیف، ئەمڕۆ پێنجشەممە، لەدوای بڵاوبونەوەی بڕیاری دادگای پێداچونەوەی هەرێمی كوردستان بۆ پەسەندكردنی سزای پێنج رۆژنامەنوس و چالاكوانی بادینان، لەلاپەڕەی خۆی لە فەیسبوك، بەپێی بڕیارەكەی دادگا كە پلەی كۆتایی وەرگرتوە، هەردو كونسوڵخانەی ئەمریكاو ئەڵمانیا لە هەولێر، شوێنێكن بۆ كاری سیخوڕی و تێكدانی ئاسایشی هەرێم و كاری تیرۆرو تێكدان.

حاكم شێخ لەتیف ئاماژەی بەوەشداوە كە ئەو دو كونسوڵخانەیە ئەگەر بەو جۆرەن ئەوا نابێت لەنێو خاكی هەرێمدا بمێنن و ئەگەر واش نین دەبێت هەڵوێستیان هەبێت "چونكە ئیتر هەر رۆژنامەنوس و چالاكوانێك پەیوەندی پێیانەوە بكات یان كردبێت بۆی هەیە روبەڕوی هەمان تۆمەت ببێتەوە."

حاكم شێخ لەتیف، پێشنیاریشی كردوە كە ئەگەر سەرۆكی هەرێمی كوردستان دەسەڵاتی خۆی بەكارنەهێنا بۆ دەركردنی لێخۆشبون بۆ سزادراوانی بادینان، ئەوا رۆژنامەنوسان و چالاكوانانی مەدەنی و رۆشنبیران لە میدیاو سۆشیال میدیاو لە واقعیشدا هەڵمەت یاخود كەمپەین و هاشتگای "كونسوڵی ئەمریكاو كۆنسوڵی ئەڵمانیا بۆ دەرەوە" بەرپا بكەن.