بزوتنەوەی گۆڕان رایگەیاند، بڕیاری پەسەندكردنی دادگای پێداچونەوە بۆ پێنج دەستگیرکراوەکەی بادینان و حوکمدانیان بە شەش ساڵ زیندانی پێشینەیەکی مەترسیدارە.
ئاوێنە: دلێر عەبدولخالق، وتەبێژی بزوتنەوەی گۆڕان لە راگەیەندراوێكدا ئەوەشی وتوە"بەڵگەکانی ئەم کەیسە و گیراوەکانی دیکە نەسەلمێنراون و لاوازن."
هەروەها ئاماژەی بەوەداوە كە "دیپلۆماتکاران کارێکی سەرەکیان دیدارە لەگەڵ رۆژنامەنوس و چالاکوانانی رێکخراوەکانی کۆمەڵگەی شارستانی. تێوەگلاندنیان لەم کەیسە نیشانەی نەبونی بەڵگە و پێشینیەکی مەترسیدارە بۆ پێگەی هەرێمی کوردستان."
وتوشیەتی"بەهۆی ئەم کەیسە هەمو نوێنەرایەتیەکانی هەرێمی کوردستان لە ئەمریکا و ئەڵمانیا و دەوڵەتانی دیکە روبەڕوی گۆشەگیری ئەبنەوە."
دەقی راگەیەندراوەكە...
بڕیاری پەسەندكردنی دادگای پێداچونەوە بۆ پێنج دەستگیرکراوەکەی بادینان و حوکمدانیان بە شەش ساڵ زیندانی پێشینەیەکی مەترسیدارە.
بزوتنەوەی گۆڕان، وەک پێشتر ھەڵوێستی فەرمی، لەرێی پشتیوانی فراکسیۆنی پەرلەمانی کوردستان و ژوری قانونی رون و رەوان بوە، بە ئامانجی پارێزگاری لە ناو و پێگەی ھەرێمی کوردستان و متمانەی ھاوڵاتیان بە دادگاکان. نابێت یاسا ببێتە ئامرازی سەرکوتی ئازادییە سیاسی و شارستانیەکان. روئیای نەگۆڕی بزوتنەوەی گۆڕان ئەوەیە:-
یەکەم: ئازادی رادەربڕین و رۆژنامەوانی پایەیەکی دیموکراسیە کە قابیلی زەوتکردن نییە.
دوەم: بەڵگەکانی ئەم کەیسە و گیراوەکانی دیکە نەسەلمێنراون و لاوازن.
سێیەم: دیپلۆماتکاران کارێکی سەرەکیان دیدارە لەگەڵ رۆژنامەنوس و چالاکوانانی رێکخراوەکانی کۆمەڵگەی شارستانی. تێوەگلاندیان لەم کەیسە نیشانەی نەبونی بەڵگە و پێشینیەکی مەترسیدارە بۆ پێگەی هەرێمی کوردستان.
چوارەم: بەهۆی ئەم کەیسە هەمو نوێنەرایەتیەکانی هەرێمی کوردستان لە ئەمریکا و ئەڵمانیا و دەوڵەتانی دیکە روبەڕوی گۆشەگیری ئەبنەوە.
بۆ رێگری لە زیانی گەورە لە هەرێمی کوردستان بە فەرمی جەخت لە گرنگی خواستی بەڕێز رێکخەری گشتی لە کۆبونەوەی لەگەڵ بەڕێز سەرۆکی ھەرێم بۆ بەکارهێنانی دەسەڵاتی قانونی و چڕکردنەوەی ھەوڵەکانیان بە ئاراستەی رێزگرتن لە مافی ئازادی رادەربڕین و دەستەبەرکردنی عەدالەت لە کەیسی رۆژنامەنوس و چالاکوانانی بادینان دەکەینەوە.
دلێر عەبدولخالق
وتەبێژی بزوتنەوەی گۆڕان