هێزەكانی رزگاریی عفرین، ئەمڕۆ هەینی، كوژرانی سەربازێكی سوپای توركیاو چوار چەكداری میلیشیاكانی سەر بەو سوپایەی لەمیانی سێ چالاكی شەڕڤاناندا لە عفرین و دەوروبەری راگەیاند. دەشڵێت: لەو چالاكییانەدا سەربازێكی دیكەی توركیاو پێنج چەكداری میلیشیاكان بریندار بون.
ئاوێنە: هێزەكانی رزگاریی عفرین، لە بەیاننامەیەكدا رایگەیاند، رۆژی 28ی نیسان، لە چالاكییەكی شەڕڤاناندا لە نزیك گوندی "بورج حەیدەر" لە ناحیەی شێراوای عفرین، دو چەكداری میلیشیاكانی سەر بە توركیا كوژراون و دو ئۆتۆمبێلی ئەو چەكدارانەش تێكشكێنراون.
بەپێی بەیاننامەكە هەمان رۆژ، هێزەكانی رزگاریی عفرین لە چالاكییەكدا لە شاری عفرین، سەربازێكی سوپای توركیا و چەكدارێكی میلیشیاكان كوژراوەو سەربازێكی دیكەو سێ چەكداری میلیشیاكانیش برینداربون.
لە بەیاننامەكەدا هاتوە، رۆژی 30ی نیسان لە گوندی "خولالكا" لە عفرین، هێزەكانیان لە چالاكییەكدا میلیشیاكانی سەر بە سوپای توركیایان كردۆتە ئامانج و لە ئاكامدا چەكدارێك كوژراوەو دوانی دیكە بریندار بون.