وەزارەتی كشتوكاڵ و سەرچاوەكانی ئاوی هەرێم رایگەیاند، لە چوارچێوەی پلانی روبەڕوبونەوەی وشكەساڵیدا، نۆ بەنداوی گەورەی ستراتیژی لە هەرێمی كوردستان دروست دەكرێن و خشتەی بەنداوە پێشنیاركراوەكانیش بڵاودەكاتەوە.

ئاوێنە: بەپێی راگەیەندراوێكی وەزارەتەكە، ئەمڕۆ یەكشەممە، لەكۆبونەوەیەكی تایبەتی نێوان هەردو وەزارەتی کشتوکاڵ و سەرچاوەکانی ئاو و وەزارەتی پلاندانان و نوێنەری سەرۆکایەتی دیوانی ئەنجومەنی وەزیراندا، دروستکردنی ئەو بەنداوە ستراتیژییانە لە رێگەی سیستەمی PPP تاوتوێکراوە.

هەرلە کۆبونەوەكەدا بڕیاردراوە دەرگای وەزارەتی کشتوکاڵ و سەرچاوەکانی ئاوی حکومەتی هەرێمی کوردستان واڵابکرێت بەڕوی ئەو کۆمپانیایانەی کە دەیانەوێت لەم بوارەدا پرۆپۆزەلی تایبەتی خۆیان پێشکەشی وەزارەت بکەن بەمەبەستی دروستکردنی بەنداوەکان و پرۆژە ئاودێرییە گەورەکان كە بەشێکە لەو هەڵمەتەی وەزارەتی کشتوکاڵ و سەرچاوەکانی ئاو بەهەماهەنگی لەگەڵ وەزارەتەکانی تر وەک پلانی روبەڕوبونەوەی وشکەساڵی لەهەرێمی کوردستان دەستی پێکردوە.

بەپێی خشتەی بەنداوە ستراتیژییە پێشنیارکراوەکان، سیانیان لە پارێزگای هەولێر، سیانیان لە پارێزگای سلێمانی و سیانەكەی دیكەیان لە پارێزگای دهۆك دروست دەكرێن.