قوباد تاڵەبانی،
جێگری سەرۆك وەزیرانی هەرێمی كوردستان لەگەڵ وەزیری دەرەوەی ئەرمینیا كۆبوەوەو
كۆمەڵێك پرسیان تاوتوێ كرد لەوانەش پرسی گەشتی ڕاستەوخۆی
نێوان هەرێمی كوردستان و كۆماری ئەرمینیا كە بڕیارە لە مانگی داهاتودا دەست پێبكات.
ئاوێنە: بەپێی راگەیەندراوێكدا
نوسینگەكەی، ئەمڕۆ شەممە، لە دوەم رۆژی سەردانەكەیدا بۆ ئەرمینیا، قوباد تاڵەبانی
لەگەڵ ئارا ئایفازیان، وەزیری دەرەوەی ئەو وڵاتە كۆبوەوەو لەكۆبونەوەكەدا
لەبارەی پەیوەندییە دو قۆڵییەكان و پێشهاتەكانی ناوچە گفتوگۆیان كرد.
هەردولا هاوڕابون لەسەر پەرەپێدانی كاری هاوبەش لەنێوان هەرێمی كوردستان و
كۆماری ئەرمینیا و لەسەر بارودۆخی كوردانی نیشتەجێی ئەرمینیاش هەڵوێستەیان كرد بەتایبەت
ئەو كوردانەی بۆ خوێندن ڕویان لەو وڵاتە كردوە.
لە تەوەرێكیتری كۆبونەوەكەدا تیشك خرایە سەر كۆمەڵگای ئەرمەنی لە كوردستان
و بەگرنگییەوە باس لە پرسی گەشتی ڕاستەوخۆی نێوان هەرێمی كوردستان و كۆماری ئەرمینیا
كرا كە بڕیارە لە مانگی داهاتودا دەست پێبكات.
هەردولا هاوڕابون لەسەر گرنگی دروستكردنی پەیوەندی بازرگانی و ئاسانكاری پێدانی
ڤیزاو كەڵك وەرگرتن لە ئەزمونی ئەرمینیا لە بواری وزە لە هەرێمی كوردستان.
سەردانەکەی قوباد تاڵەبانی بۆ کۆماری ئەرمینیا لەسەر بانگهێشتی فەرمی حکومەتی
ئەرمینیایە و سێ رۆژ دەخایەنێت. لەم سەردانەدا هەر یەکە لە دارا رەشید وەزیری
پلاندان و ئومێد سەباح سەرۆکی دیوانی ئەنجومەنی وەزیران یاوەری جێگری سەرۆک وەزیرانن.