مەحمود سەنگاوی، فەرماندەی میحوەری گەرمەسێری هێزی پێشمەرگە رایگەیاند، سبەی سێشەممە، قۆناغی یەكەمی ژوری ئۆپەراسیۆنی هاوبەشی نێوان پێشمەرگەو سوپای عێراق لە سنوری موسڵ، كەركوك، دیالەو مەخمور دەست بەكاردەبێت.

ئاوێنە: ئەمڕۆ دوشەممە، وەفدیکی سەرۆکایەتی ھەرێم و وەزارەتی پێشمەرگەو ھێزەکانی 70 بۆ رێکخستنی ئۆپەراسیونی ھاوبەشی پێشمەرگە و سوپای عیراق سەردانی میحوەری گەرمەسێر و کوڵەجۆیان کردو ھەروەھا وەفدێکی ھێزەکانی ھاوپەیمانان سەردانی میحوەری گەرمەسێریان کرد بەمەبەستی پڕچەکردن و دابینکردنی پێداویستییە لۆجیستیەکانی پێشمەرگە.

مەحمود سەنگاوی، فەرماندەی میحوەری گەرمەسێر  لە كۆنگرەیەكی رۆژنامەوانیدا رایگەیاند، وەزارەتی پێشمەرگە ھەوڵەکانی زیاتر کردوە بۆ رێکخستنەوەو یەکخستنەوەی ھێزەکانی پێشمەرگە لە یەكەكانی 70 و 80 .

وتیشی، بۆ دروستکردنی ژوری ئۆپەراسیونی ھاوبەشی پێشمەرگە و سوپای عێراق، سبەی قۆناغی یەکەمی لایەنە ھونەرییەکانی ئەو ژورە دەست بەکاردەبێت لەسنوری کەرکوک و موسڵ و دیالە و مەخمور، کە سەرەتا لە ھەر میحوەرێک پێنج ئەفسەری پێشمەرگە و پێنج ئەفسەری سوپای عێراق دەستبەکاردەبن.