2021-05-18   331     
جێگری دوهمی سهرۆكی ئهنجومهنی نوێنهرانی عێراق داوا له حكومهتی فیدراڵی دهكات به زوترینكات دهستبكات به جێبهجێكردنی یاسای بودجهی گشتی 2021 و رایدهگهیهنێت، پێویسته ههرێم و بهغداش پهله بكهن لهجێبهجێكردنی رێكهوتنی دارایی و نهوتی نێوانیان به مهبهستی ناردنی بهشه بودجهی ھهرێمی كوردستان.
ئاوێنه: لهراگهیهندراوێكدا، بهشیر خهلیل حهداد، جێگری سهرۆكی ئهنجومهنی نوێنهرانی عێراق داوای له حكومهتی فیدڕاڵی كرد، پهله بكات له تهواوكردنی رێكارهكانی جێبهجێكردنی یاسای بودجهی گشتی ساڵی 2021ی فیدڕاڵی، كه لهلایهن ئهنجومهنی نوێنهرانهوه له رۆژی 31ی (ئازار/3)ی 2021 دهنگی لهسهردا.
جێگری سهرۆكی ئهنجومهنی نوێنهران، نیگهرانی خۆی دهربڕی لهوهی كه تاوهكو ئێستا حكومهتی فیدڕاڵی دهستی به جێبهجێكردنی ههنگاوهكانی ئهو یاسایه نهكردوه كه كاریگهری راستهوخۆی لهسهر ژیانی هاوڵاتیان و زیاد بونی كێشهكانیان ههیه.
بهشیر حهداد داواشی له حكومهتی فیدراڵی كرد كه به زوترینكات بهشه بودجهی پارێزگاكان بنێرێت تا پرۆژه خزمهتگوزارییهكان جێبهجێبكرێن و راشیگهیاند، پێویسته ھهردو حكومهتی فیدڕاڵ و حكومهتی ھهرێم پهله بكهن لهجێبهجێكردنی رێكهوتنی دارایی و نهوتی نێوانیان به مهبهستی ناردنی بهشه بودجهی ھهرێمی كوردستان.