ڕێكخراوە ژینگەییەكان لەسەر وشكبونی دارستانی كەسنەزان دێنە دەنگ، حكومەتیش هۆكاری وشكبوونی بەشێكی زۆری دارەكانی ئەم دارستانە ئاشكرا دەكات.

ئاوێنە: لە لێدوانێكی ڕۆژنامەوانیدا ئاسۆ شكاك بەرپرسی ڕێكخراوی ئاڤیار بۆ هۆشیاری ژینگە داوا لە حكومەت دەكات بودجەی پێویست بۆ دووبارە سەوزكردنەوەی دارستانەكە دابین بكات، گوتیشی: كەمتەرخەمی و نەبوونی ڕێگە بۆ گەیاندنی ئاوی پێویست بۆ ئەو دارانە وایكرد بەشی زۆری دارستانەكە وشك ببێت.

هاوكات عەبدولغەفور تاهیر، لێپرسراوی بەشی دارستانی هەولێر، ڕەتی دەكاتەوە هۆكاری وشكبوونی دارەكان بێ‌ ئاوی بووبێت و دەڵێ هۆكارەكەی سوتانی دارستانەكە بوو لە مانگی شەشی ساڵی ڕابردوو، بەم هۆیەشەوە بەشێك لە دارەكانی نەژیانەوەو وشك بوون.

دوای بڵاوبوونەوەی وشكبوونی بەشێك لە دارەكانی دارستانی كەسنەزان، ژمارەیەك لە ڕێكخراوە ژینگەییەكان هاوڕێ‌ لەگەڵ دەستەی ژینگەی هەولێر و بەڕێوەبەرایەتی دارستان و پۆلیسی دارستان سەردانی شوێنی وشكبونی دارەكانیان كرد، داوایانكرد حكومەت بودجەی پێویست بۆ دووبارە سەوزبوونەوەی دارستانەكە تەرخان بكات.