مەسعود بارزانی، سەرۆكی پارتی رایگەیاند، ئەوانەی دوێنێ شەممە، پێنج پێشمەرگەیان لە چیای مەتینا لە قەزای ئامێدی شەهید كرد، "بە سزای خۆیان دەگەن."

ئاوێنە: بەپێی راگەیەندراوێكی نوسینگەكەی، ئەمڕۆ ەکشەممە، مەسعود بارزانی لە ڕێی تەلەفۆنەوە پەیوەندی بە خانەوادەی ئەو پێشمەرگانەوە کرد کە دوێنێ شەممە "لە ئەرکی ئاسایی خۆیاندا لە ئەنجامی ھێرشی چەکدارانی پەکەکە شەھیدبون."

بەپێی راگەیەندراوەكە، سەرۆكی پارتی بە خانەوادەی ئەو شەھیدانەی ڕاگەیاند، "پرسەی ئەو شەھیدانە پرسەی منە و ئینجا ھی ئێوەیە و، ھاوسۆزی و ھاوخەمی خۆی پێگەیاندن."

هەر بەگوێرەی راگەیەندراوەكە، مەسعود بارزانی ئەوەشی بۆ خانەوادەی شەهیدان دوپاتکردەوە کە "ئەوانەی تاوانی شەھیدکردنی پێشمەرگەکانیان ئەنجامداوە بە سزای خۆیان دەگەن."

راگەیەندراوەكە ئاماژەی بەوەشداوە كە دواتر بارزانی ھەر لە ڕێی تەلەفۆنەوە پەیوەندی بە یەک بەیەکی ئەو پێشمەرگانەشەوە کرد کە لە روداوەكەی مەتینادا برینداربون و ھیوای چاکبونەوەی خێرای بۆ خواستن.