وەفدێكی وەزارەتی كشتوكاڵ و سەرچاوەكانی ئاوی هەرێم بە سەرۆكایەتی وەزیری
وەزارەتەكە لە ئێرانن و ئەمڕۆ دوشەممە لەگەڵ وەزارەتی كشتوكاڵی ئەو وڵاتە
كۆبونەوەو تاوتوێی چەند پرسێكیان كرد لەوانەش كێشەی ئاوی روباری سیروان و زێی
بچوك.
ئاوێنە: پاشنیوەڕۆی ئەمڕۆ دوشەممە، بێگەرد تاڵەبانی، وەزیری كشتوكاڵ و سەرچاوەكانی
ئاو، لە راگەیەندراوێكدا وتی"ئەمڕۆ لە میانی سەردانە فەرمیەکەمان بۆ کۆماری ئیسلامی
ئێران، بەئامادەبونی بریکاری وەزارەت و تیمێکی باڵای وەزارەتمان، لەگەڵ وەزارەتی
کشتوکاڵی ئێران کۆبوینەوە."
ئەوەشی خستۆتەڕو، لەم کۆبونەوەیەدا کە مورتەزا رەزایی، جێگری
وەزیری کشتوکاڵی ئێران بۆ بەرهەمی ئاژەڵی و زۆربەی بەڕێوەبەرانی گشتی تایبەتمەند ئامادە بون، لە نێوان
هەردولادا جەخت لەسەر پەرەپێدانی پەیوندییەکان و هەماهەنگی لە ساغکردنەوەی بەرهەمەکان
کرایەوە، بەتایبەتی له بوارەکانی بەرهەمهێنانی پیشەسازی کشتوکاڵی و پەروەردەکردنی
ئاژەڵ و توێژینەوە لەسەر ئاژەڵی دەرەکی، بەتایبەتی مانگای هۆڵشتاین و گونجاندنی لەگەڵ
کەشوهەوای وڵاتی ئێران و بەرزکردنەوەی ئاستی بەرهەم لەڕوی شیرو گۆشتی سورو کەرتی دەواجن
و هەنگوین و بنەتۆ و گاوداری و بەرهەمەکانی لەقوتونان و پرۆژەکانی بەرهەمی کشتوکاڵی
لەڕێگەی خانوی پلاستیکی.
بێگەرد تاڵەبانی وتوشیەتی، هەروەها لە تەوەرێکی تری کۆبونەوەکەماندا باسی وشکەساڵی
و کێشەی ئاوی سیروان و زێی بچوکمان کرد کە سەرچاوەکەی لەوڵاتی ئێراندایە.
ئەوەشی خستۆتەڕو، بۆ مەبەستی سودوەرگرتن
لە پرۆژەکانی بونیادنانی بەنداوەکان و ئاودێری، بانگێشتی کۆمپانیاکانی ئێرانمان
کرد بۆ هەرێمی کوردستان بۆ ئەوەی هەماهەنگی و بەرهەمهێنان بکەن لە بواری پرۆژەکانی
کشتوکاڵی و ئاودێری.