ئەنجومەنی باڵای دادوەری عێراق رونكردنەوە لەبارەی ئازادكردنی فەرماندەكەی حەشدی شەعبی دەدات
  2021-06-09       486       

ئەنجومەنی باڵای دادوەری عێراق، ئێوارەی ئەمڕۆ چوارشەممە، رایگەیاند، بڕیاردراوە بە ئازادكردنی قاسم موسلیح، فەرماندەی ئۆپەراسیۆنەكانی حەشدی شەعبی لە ئەنبار، ئەوەش دوای ئەوەی هیچ بەڵگەیەك نەبوە لەسەر ئەوەی كة ناوبراو تێوەگلابێت لە كوشتنی چالاكوان ئیهاب وەزەنی.

ئاوێنە: ئەنجومەنی باڵای دادوەری لە بەیاننامەیەكدا رایگەیاند، لەبارەی كەیسی كوژرانی چالاكوان ئیهاب وەزەنی، دوای لێكۆڵینەوە دەركەوتوە هیچ بەڵگەیەك بۆ تۆمەتباركردنی قاسم موسڵیح بە كوشتنی ئەو چالاكوانە پێشكەش نەكراوە، بەتایبەت لەڕێگەی زانیارییەكانی پاسپۆرتەوە دەركەوتوە كە فەرماندەكەی حەشدی شەعبی لەكاتی كوژرانی ئەو چالاكوانەدا لە دەرەوەی عێراق بوەو خۆیشی رەتیكردۆتەوە كە دەستی لەو تاوانەدا هەبوبێت یاخود بەشدار بوبێت تێیدا.

ئەوەشی خستۆتەڕو، دادگای لێكۆڵینەوە هیچ بەڵگەیەكی بەردەست نەبوە بیسەلمێنێت فەرماندەكەی حەشدی شەعبی بەشێوەی راستەوخۆ یان ناڕاستەوخۆ لەو تاوانەوە گلابێت ئیدی بە هاندان بۆ كوشتنی بێت یان بەشێوازی تر.

ئەوەشی خستۆتەڕو، بۆیە دوای راگرتنی بۆ ماوەی 12 رۆژ، فەرماندەكەی حەشدی شەعبی ئازادكرا، كە لەو ماوەیەدا هەمو هەوڵێك خراوەتەگەڕ بۆ گەیشتن بە بەڵگەیەك لەسەر تاوانەكەو لایەنەكانی لێكۆڵینەوەو هەروەها خێزانی وەزەنی لەكاتی وەرگرتنی وتە لێیان، هیچ بەڵگەیەكیان بەگوێرەی یاسا پێشكەش نەكردوە.

بەیاننامەكە جەختی كردۆتەوە كە تاوانی كوشتنی چالاكوانی ئیهاب وەزەنی، بە تاوانی تیرۆر دەژمێردرێت و ئەنجامدەرانی بەگوێرەی یاسا سزای لەسێدارەدانیان بەسەردا دەسەپێنرێت و بۆ ئەو سزا قورسەش هیچ بەڵگەیەك لەبەردەستدا نییە تا قاسم موسڵیحی لەسەر دادگایی بكرێت و سزاكەی بەسەردا بسەپێنرێت.

زۆرترین بینراو
© 2021 Awene Online, Inc. All Rights Reserved.
×