عەتا سەراوی: شێوازی ئایندەی كاری سیاسی خۆم دیاری دەكەم
  2021-06-11       1372       

عەتا سەراوی، ئەندامی سەركردایەتی یەكێتی رایگەیاند، بە نیازە لە زنجیرە وتارێكدا پاڵپشت بە بەڵگە، زانیارییەكانی 41 ساڵ "خەبات و تێكۆشان"ی خۆی، "بەھێمنی و لەسەرخۆ" شێوازی ئایندەی كاری سیاسی خۆی دیاری بكات.

ئاوێنە: عەتا سەراوی، ئەمڕۆ هەینی، لە نوسینێكدا لە لاپەڕەی خۆی لە فەیسبوك، نوسیویەتی"دوای ساڵانێکی زۆری بەرخۆدان و خەباتی بێ وچانی پێشمەرگانەو تێکۆشان لەبواری جۆراوجۆری خەباتگێڕی و کوردایەتی بەشدارو ئاگادار لەزۆر ڕوداویی سیاسی و کەوتن و ھەڵسانەوە نزیک لەچوار دەیەی خەباتی سەختی پڕ لەململانێیی قورسی ئاڵۆزی پڕلەنھێنی و ڕوبەڕوبونەوەی چەندین پلانی تاقەت پڕوکێنی دور لەبەھایی مرۆڤایەتی و کارەساتی دڵ تەزێنی خوێناوی و ئازارو غەم و سپڵەیی و بێ وەفایی و خیانەتی ھاوڕێ و ھاوسەنگەرو دوڕویی و بێ شەرمی و بێ بەڵێنی و کەڵەکەبونی ئازارو غەمەکان و چاوەڕوانی کۆکردنەوەی سەدان بەڵگەو نھێنی و زانیاری مەترسیدارو گیانبازی لەگەڵ مەرگ تێپەڕبون و بڕینی پلەکانی پێشمەرگایەتی و حیزبی تێکەڵ بون و ناسینی زۆربەی سەرکردە سیاسییەکانی کوردستانی گەورەو باشور بەئاگاو ھەندێ جار بەشدار لەپەیوەندییە سیاسی و ئەمنییەکانی کوردستان و حکومەتەکانی داگیرکەری ھەر چوار پارچەی کوردستان ڕوبەڕوبونەوەی چەندین تۆمەت و پلانی لەکەدارکردن و کوشتن دوای 41 ساڵ خوێنڕشتن و برینداربون و دەیان شەھید لەمڕۆ بەدوا بەپێی کات و زۆر بەھێمنی و لەسەرخۆ بە چەند زنجیرە وتارێکی پاڵپشت بەبەڵگەی بەردەست زۆر بەچڕی و لەھەمان کات بەکورتی پانۆڕامای 41 ساڵی خەبات و تێکۆشان بڵاو دەکەمەوە و شێوازی ئایندەی کاری سیاسی خۆم ڕون و دیاری دەکەم." 

ئەو ئەندامەی سەركردایەتی یەكێتی، وتوشیەتی، كارەكەی بۆ ئەوەیە كە بتوانێت "بەرپرسانەو دور لەھەڵچون و لایەنگری، ڕوداوەکان" بگێڕێتەوەو "تا بەویژدانێکی ئاسودەوە دوا بڕیارو شێوازی کارو ئایندەی سیاسی" خۆی دیاری بكات.


زۆرترین بینراو
© 2021 Awene Online, Inc. All Rights Reserved.
×