ئاسایش دەستگیركردنی بكوژی هاوڵاتییەكەی گەڕەكی رزگاری شاری سلێمانی راگەیاند
  2021-06-12       1365       

ئاسایشی سلێمانی رایگەیاند، بە هەماهەنگی لەگەڵ هێزە ئەمنییەكانی عێراق بكوژی ئەو هاوڵاتیەی گەڕەكی رزگاری شاری سلێمانیان دەستگیركردوە كە بە ئۆتۆمبێلی كوژراوەكەوە هەڵاتبو بۆ تكریت.

ئاوێنە: بەڕێوەبەرایەتی ئاسایشی پارێزگای سلێمانی، پێشنیوەڕۆی ئەمڕۆ شەممە، لە راگەیەندراوێكدا وتی"دوای ئەوەى دوێنێ  11/6/2021 لەشارى سلێمانى  هاوڵاتیەک بەناوى (عوسمان حمەسەعید) لەگەڕەکی رزگارى شارى سلێمانى کوژراو ئۆتۆمۆبیلەکەى لە جۆرى  تۆیۆتۆ لاندکرۆزەر ستێشن دزراو تاوانبارى تاوانەکە هەڵات و ئۆتۆمۆبیلەکەى بەرەو خواروى عێراق بردبو، دەستبەجێ هێزەکانمان بەفەرمانى دادوەرو بەپێی ماددەى (406) لەیاسای سزادانى عێراقى و بەسەرپەرشتى دەزگاى ئاسایشى هەرێمى کوردستان و  بە هەماهەنگی لەگەڵ هێزەکانى (بەڕێوەبەرایەتى ئاسایشى پارێزگاى کەرکوک، دەزگاى ئاسایشى نیشتمانى عێراق، ژورى ئۆپراسیۆنە هاوبەشەکانى بەغدا، فەرماندەیی پۆلیسى پارێزگاى سەڵاحەدین)،  توانیمان  ناسنامە و شوێنى دانیشتنى کەسى تاوانبار بەناوى (س. ح. ح. ت.) لەدایکبوى ساڵى 1998 تکریت، دەست نیشان بکەین و تاوانبار دەستگیربکرێت و دەستبگیرێت بەسەر ئۆتۆمۆبێلە دزراوەکەدا."

ئەوەشی خستۆتەڕو"تاوانبار ماوەى چەند مانگێکە، هاتۆتە شاری سلێمانى و نیشتەجێبوە، بەردەوام کارى بۆ کوژراوەکە کردوه، دواى ئەنجامدانى تاوانەکەى بە ئۆتۆمۆبێلەکەیەوە هەڵدێت بۆ شارى تکریت."

ئاسایشی سلێمانی وتوشیەتی"لە ئۆپراسیۆنێکى هاوبەشدا لەسەر زانیارییەکانى ئاسایشى پريزگاى سلێمانى و لەلایەن تیمیکى هاوبەشەوە توانرا کەسى داواکراو لەماوەى کەمتر لە 24 سەعاتدا دەستگیربکرێت."

ئەوەشی وتوە"بەفەرمانى دادوەر ڕاگیراوەو دەست بەسەر ئۆتۆمبێلە دزراوەکەدا گیراوەو لێکۆڵینەوە لە کەیسەکەى بەردەوامە."

 

زۆرترین بینراو
© 2021 Awene Online, Inc. All Rights Reserved.
×