پۆلیسی سەڵاحەدین: بكوژی هاوڵاتییەكەی سلێمانی ئۆتۆمبێلەكەی لە تكریت زۆر بە هەرزان فرۆشتوە
  2021-06-12       2043       

پۆلیسی سەڵاحەدین، رایگەیاند، بكوژی هاوڵاتیەكەی گەڕەكی رزگاری شاری سلێمانی، ئۆتۆمبێلی كوژراوەكەی بە پارەیەكی زۆر كەم لە تكریت فرۆشتوەو دواتر هەڵاتوە بۆ ئەنبارو لەوێ دەستگیركراوە.

ئاوێنە: بەڕێوەبەرایەتی پۆلیسی پارێزگای سەڵاحەدین، ئەمڕۆ شەممە، لە بەیاننامەیەكدا رایگەیاند، تۆمەتبارێك دەستگیركراوە كە هەڵساوە بە كوشتنی هاوڵاتییە لە شاری سلێمانی و بردنی ئۆتۆمبێلەكەی لە جۆری لاندكرۆزەر كە هەڵگری تابلۆی سلێمانییە.

هێمای بۆ ئەوەش كردوە دوای ئەوەی زانیارییە پێگەیشتوە كە ئۆتۆمبێلێكی جۆری لاندكرۆزەری رەش لە پێشانگاكانی تكریت بە پارەیەكی زۆر كەم فرۆشراوە، تیمێكی هاوبەش پێكهینراوە لەلایەنە ئەمنییەكان و لەكاتی گەڕان بەدوای ئۆتۆمبێلەكەدا، لەگەڵ دو كەسدا دەستی بەسەردا گیرا كە كڕی بویان و دوای لێكۆڵینەوە لە بەڵگەنامەكان و پەیوەندیكردن بە هەرێمی كوردستانەوە دەركەوت خاوەنی ئۆتۆمبێلەكە لە روداوێكدا لە سلێمانی كوژراوە ئۆتۆمبێلەكەی براوە.

وتوشیەتی، دوای فرۆشتنی ئۆتۆمبێلەكە، بكوژی ئەو هاوڵاتییەی شاری سلێمانی هەڵاتوە بۆ پارێزگای ئەنبارو دوای هەماهەنگی نێوان دەزگای ئاسایشنی نیشتمانی لە سەڵاحەدین و دەزگای ئاسایشی نیشتمانی لە ئەنبار، توانرا لە بۆسەیەكدا بكوژەكە لە پارێزگای ئەنبار دەستگیربكرێت.

ئاماژەی بەوەشداوە كە بەبڕیاری دادوەر ئەو دو كەسەیش راگیراون كە ئۆتۆمبێلەكەیان لە تۆمەتبارەكە كڕیوەو دەستیش بەسەر ئۆتۆمبێلەكەدا گیراوە.

زۆرترین بینراو
© 2021 Awene Online, Inc. All Rights Reserved.
×