وەزارەتی پێشمەرگە: ته‌رمی‌ جوانڕۆ کەریم بەدەستبەستراوی لەنێوان کەسنەزان‌و دێگەڵە دۆزراوەتەوە
  2021-06-22       1786       
جوانڕۆ کەریم
وه‌زاره‌تی‌ پێشمه‌رگه‌ ڕایده‌گه‌یه‌نێت كه‌ ته‌رمی‌ جوانڕۆ کەریم بەدەستبەستراوی لەنێوان کەسنەزان‌و دێگەڵە دۆزراوەتەوە.

ئاوێنه‌: بەرەبەیانی‌ ئه‌مڕۆ سێشه‌ممه‌، تەرمی هاوڵاتیەک بەناوی (جوانڕۆ کەریم)، تەمەن (٤٤) ساڵ، لەگوندی (پەلکە ڕەش) سەر بەناحیەی (دێگەڵە) دۆزرایەوە. قوربانییه‌كه‌ هونه‌رمه‌نده‌و له‌هه‌مانكاتدا ئەندامی تیپی جوق‌و مۆسیقای سەربازی سەر بەوەزارەتی پێشمەرگە بووه‌. 

وەزارەتی پێشمەرگە له‌ڕونكردنه‌وه‌یه‌كدا ده‌ڵێت، "ئەمڕۆ ۲۲ی حوزەیرانی ۲۰۲۱ هەواڵی گیانلەدەستدانی (ن.چ.د٨ جوانڕۆ کەریم قادر )  کارمەندی وەزارەتمان پێگەیشت، دوای بەدوا داچوونی بەرپرسی یەکه سەربازیەکەی لەگەڵ هێزەکانی پۆلیس و ئاسایش، تەرمی ناوبراو بەدەستبەستراوی لە نزیک گوندی (پەلکەڕەش)کە دەکەوێتە نیوان کەسنەزان و دێگەڵە  دۆزراوەتەوە."

ئاماژه‌ بۆ ئه‌وه‌ش كراوه‌ كه‌ ناوبراو ئەندامی تیپی جوق و مۆسیقای سەربازی بوو، سەر بە فەرماندەیی ئینزیباتی سەربازی وەزارەتی پێشمەرگە. 

ئه‌وه‌ش خراوه‌ته‌ڕو كه‌ وەزارەتی پێشمەرگە بەدواداچوون و رێوشوێنی پێویستی لەسەر ئەم تاوانە گرتۆتەبەر و لەئێستادا لەلایەن پۆلیسەوە دۆسیەی لێکۆڵینەوەی بۆ کراوەتەوەو چاوەڕێی دەرئەنجامی لێکۆڵینەوەکانین. 

هه‌ر له‌و باره‌یه‌وه‌ پۆلیسی‌ هه‌ولێر له‌ڕونكردنه‌وه‌یه‌كدا ڕایگه‌یاندوه‌، "ئەمڕۆ ڕێکەوتی (٢٠٢١/٦/٢٢)، کاتژمێر (٥)ی بەرەبەیان تەرمی هاوڵاتیەک بەناوی (جوانڕۆ کەریم)، تەمەن (٤٤) ساڵ، لە گوندی (پەلکە ڕەش) سەر بە ناحیەی (دێگەڵە) دۆزرایەوە، هێزەکانی بەڕێوەبەرایەتی پۆلیسی پارێزگای هەولێر کاتژمێر (٥)ی بەرەبەیان گەیشتنە شوێنی مەبەست، لەلێکۆڵینەوە سەرەتاییەکان دەرکەوت کەوا ناوبراو پێشمەرگە بووە لە وەزارەتی پێشمەرگە. لەئێستادا پۆلیس دەستی بەلێکۆڵینەوە کردووە بۆ گەیشتن بە هۆکاری ڕاستی و ڕوونی ڕووداوەکە، لە ئایندەیەکی نزیکدا زانیاری زیاتر دەخەینە ڕوو."

پێشتر نیاز محەممەد نوری، نەقیبی ھونەرمەندانی کوردستان رایگەیاندبو، ئەو هونەرمەندە "شەوی رابردو لەوەزارەتی پێشمەرگە لەهەولێر بووەو بۆ نانخواردن چووەتە دەرەوە، دواتر نەگەڕاوەتەوەو هاوڕێکانیشی زۆر بەدوایدا گەڕاون، بەڵام هیچ زانیارییەکان لەسەری دەستنەکەوتووە، ئەمڕۆش تەرمێک لەلای دێگەڵە دۆزراوەتەوەو ئاگادارکراونەتەوە بۆئەوەی لێی بکۆڵنەوەو دەرکەوتووە کە تەرمی ئەو هونەرمەندەیە".
زۆرترین بینراو
© 2021 Awene Online, Inc. All Rights Reserved.
×