ئەندامێکی لیژنەی پێشمەرگەی پەرلەمانی کوردستان رایگەیاند، بڕیارە وەزیری پێشمەرگە و سوپاسالار و چەند بەرپرسێکی وەزارەتی پێشمەرگە بانگھێشتی پەرلەمان بکەین و تێیدا گفتوگۆ لەبارەی یەکخستنی ھێزی پێشمەرگە و کێشەکانی پێشمەرگە دەکەین.

ئاوێنە: سەعید ھەرکی، ئەندامی لیژنەی پێشمەرگەی پەرلەمانی كوردستان، ئەمڕۆ چوارشەممە، بە ماڵپەڕی رەسمی پارتی وت"ئێمە وەکو لیژنەی پێشمەرگە لیژنەیەکمان پێک ھێنا بۆ ئەوەی لە کێشە و گرفتی پێشمەرگە بکۆڵینەوە و بەرنامەیەکمان دانا و سەردانی زۆرینەی میحوەرەکانمان کردوە و تەنھا میحوەری بادینان ماوە. ئەوانەی خانەقین و قەرەچوغ تەواو بونە و ھەمو کێشەکانمان دەستنیشان کردون و تەنھا ماوە قسەیان لەسەر بکرێت و گرفتەکان چارەسەر بکرێن، بۆیە بۆ ئەو مەبەستە بانگھێشتی وەزیری پێشمەرگە و سوپاسالار و چەند کەسی پەیوەندیدار بە پێشمەرگە دەکەین."

سەعید ھەرکی وتیشی"جگە لەوەش، باسی کێشەکانی دیکەی پێشمەرگەش دەکەین وەکو یەکخستنی ھێزی پێشمەرگە و بەتایبەت کێشەکانی پێشمەرگە لە سەنگەرەکان."

ھەرکی باسی لەوەش کرد: "بڕیارە دوای ئەوەی بانگھێشتی وەزیری پێشمەرگە و بەرپرسانی پێشمەرگە دەکەین بۆ لیژنە، دواتر بانگھێشتی وەزیری پێشمەرگە بۆ کۆبونەوەیەکی تایبەتی پەرلەمانی کوردستان دەکەین."