كۆچبەرێكی كورد لە یۆنان گیانی لەدەستدا
  2021-06-23       619       

یەكێكی دیكە لەو كۆچبەرانەی كە رۆژی 5ی ئەم مانگە لە روداوێكی هاتوچۆدا لە یۆنان بریندار بببو، ئەمڕۆ چوارشەممە، لە یەكێك لە نەخۆشخانەكانی ئەو وڵاتە گیانی لەدەستدا، بەوەش ژمارەی ئەو كۆچبەرە كوردانەی لەو روداوەدا گیانیان لەدەستدا گەیشتە سێ كەس.

ئاوێنە: بەپێی راگەیەندراوێكی رێکخراوی مافی مرۆڤی هەنگاو، ئەمڕۆ چوارشەممە، كۆچبەرێكی كوردی خەڵکی مەریوانی رۆژهەڵاتی كوردستان بە ناوی “ڕامین شەریفی” کە 18 ڕۆژ پێش ئێستا لە روداوێکی هاتوچۆدا لە وڵاتی یۆنان بە سەختی بریندار بوبو، لە یەکێک لە نەخۆشخانەکانی ئەو وڵاتە گیانی لە دەستدا.

رامین شەریفی سەعات 6ی سەرلەبەیانی ڕۆژی شەممە 5ی 6ی 2021، بەهۆی وەرگەڕانی ئۆتۆمبێلێکی هەڵگری كۆچبەران لە شاری كاڤالا”ی وڵاتی یۆنان لە گەڵ كۆچبەرێكی دیکەی خەڵکی مەریوان بە ناوی لوقمان ئەحمەدی بریندار بوبون.

لەو روداوەدا دو كۆچبەری دیکەی خەڵکی مەریوان بە ناوەکانی  “موحسین ئەحمەدی” و “ڕزگار قوربانی” دەستبەجێ گیانیان لە دەست دابو.

تەرمی ئەو دو کەسە چەند رۆژێك پێش ئێستا گەڕێندرایەوە بۆ زێدی خۆیان کە حکومەتی ئێران لە بری گەڕاندنەوەی هەر تەرمێک 500 میلیۆن تمەنی لە بنەماڵەکانیان وەرگرتوە.

هەنگاو پێشتر لە زاری یەکێک لە كۆچبەرەكانەوە رایگەیاندبو، پۆلیسی یۆنان شوێنی ئۆتۆمبێلی هەڵگری ئەو كۆچبەرانە کەوتوە و ئۆتۆمبێلەکەش بەهۆی خێرایی زۆرەوە وەرگەڕاوە.


زۆرترین بینراو
© 2021 Awene Online, Inc. All Rights Reserved.
×