روانگەی سوری بۆ مافەكانی مرۆڤ رایگەیاند، ئێوارەی ئەمڕۆ دوشەممە، بنكەیەكی
سەربازی هێزەكانی ئەمریكا لەنێو كێڵگەی نەوتی "ئەلعومەر" لە پارێزگای
دێرەزوری سوریا بە موشەك بۆردومان كراوە.
ئاوێنە: روانگەی سوری بۆ مافەكانی مرۆڤ لە راگەیەندراوێكدا ئاماژەی
بەوەداوە كە چەند موشەكێك لە كێڵگەی "ئەلعومەر" لە پارێزگای دێرەزور لە
سوریا كەوتونەتە خوارەوە كە بنكەیەكی سەربازی ئەمریكا لەنێو كێڵگەكەدا.
ئەوەشی خستۆتەڕو، لەئەنجامی بۆردومانەكە زیانی ماددی كەوتۆتەوەو چەند
ئۆتۆمبێلێكیش لەو شوێنەی كراوەتە ئامانج سوتاون بەڵام تا ئێستا هیچ زانیارییەك
لەبارەی بونی زیانی گیانییەوە نییە.
بەپێی قسەی روانگەی سوری، هێرشەكە لەلایەن "میلیشیاكانی لایەنگری
ئێران"ەوە لەناوچەكە ئەنجام دراوە.
هەروەك هێمای بۆ ئەوەش كردوە كە بەرلەوە فڕۆكەی پشكنینی سەربە هێزەكانی
ئەمریكاو هاوپەیمانی نێودەوڵەتی لە ئاسمانی ناوچەكە سوڕاونەتەوە.
ئەوەش دوای چەند سەعاتێك دێت لەوەی كە هێزەكانی ئەمریكا بەرەبەیانی ئەمڕۆ
هێرشیان كردە سەر میلیشیاكانی لایەنگری ئێران لەسەر سنوری سوریاو عێراق.