باڵیۆزی هەمیشەیی
ئێران لە نەتەوە یەكگرتوەكان جەخت دەكاتەوە كە وڵاتەكەی هیچ پەیوەندییەكی بەو
هێرشانەوە نییە كە لە عێراق دەكرێنە سەر كامەندان و دامەزراوە ئەمریكییەكان.
ئاوێنە: مەجید تەخت
رەوانچی، باڵیۆزی هەمیشەیی ئێران لە نەتەوە یەكگرتوەكان، لە نامەیەكدا بۆ سەرۆكی
ئەنجومەنی ئاسایشی نێودەوڵەتی، وەڵامی نامەیەكی باڵیۆزی هەمیشەیی ئەمریكای لە
نەتەوە یەكگرتوەكان داوەتەوە كە ئێرانی تۆمەتبار كردوە بەوەی لە پشت هێرشەكانی سەر
دامەزراوە ئەمریكییەكانەوەیە لەعێراق.
مەجید تەخت
رەوانچی لەنامەكەیدا وتویەتی، پێشتریش چەندین جار وتومانە كە كۆماری ئیسلامی ئێران
هیچ پەیوەندییەكی بە راستەوخۆ و ناڕاستەوخۆ بە هیچ هێرشێكی چەكدارانەوە نییە كە
لەلایەن هەر كەسێك یاخود گروپێكەوە كرابێتە سەر كارمەندان و دامەزراوە
ئەمریكییەكان لەعێراق.
وتوشیەتی، لەسەر ئەم بنەمایە هەر هەوڵێك بۆ
تۆمەتباركردنی ئیرانی بەو تۆمەتە، هەوڵێكی هەڵەیەو هیچ زانیارییەكی بەڵگەدار
لەخۆناگرێت و هیچ بنەمایەكیشی نییە.
هەروەها باڵیۆزی ئێران لە نەتەوە
یەكگرتوەكان رایگەیاندوە كە وڵاتەكەی لێكدانەوەی ئەمریكا بۆ ماددەی 51ی بەڵگەنامەی
نەتەوە یەكگرتوەكان بۆ پاساوهێناوە بۆ هێرشە سەربازییەكە لەسەر سنوری نێوان سوریاو
عێراق كە رۆژی 27ی ئەم مانگە ئەنجامی داوەو ئێران ئەو هێرشە بە نایاسایی و
پێشێلكردنی سەروەری ئەو دو وڵاتە دەزانێت.