بەهۆی بەرزبونەوەی رێژەی توشبون بە كۆرۆنا، ئەمڕۆ چوارشەممە، لیژنەی باڵای تەندروستی و سەلامەتی نیشتمانی عێراق، بڕیاریدا بە درێژكردنەوەی قەدەغەی هاتوچۆ بۆ ماوەی هەفتەیەكی دیكە لە 11ی شەو بۆ 5ی بەیانی.

ئاوێنە: ئەمڕۆ چوارشەممە، لیژنەی باڵای تەندروستی و سەلامەتی نیشتامنی عێراق بە سەرۆكایەتی مستەفا كازمی، سەرۆك وەزیرانی عێراق كۆبوەوەو چەند بڕیارێكی نوێی لەبارەی دۆخی كۆرۆنا دەركرد.

بەپێی بەیاننامەی كۆبونەوەكە، لە كۆبونەوەكەدا تاوتوێی مەترسییەكانی دۆخی ئێستای كۆرۆنا لە عێراق كراوە، بەشێوەیك كە لەماوەی سێ هەفتەی رابردودا رێژەی توشبون زۆر بوە.

لە كۆبونەوەكەدا بڕیاردراوە پڕۆسەی پێدانی ڤاكسین بە فەرمانبەرانی حكومەت خێرا بكرێت.

هەروەها بڕیاردراوە بە درێژكردنەوەی قەدەغەی هاتوچۆ بۆ ماوەی یەك هەفتەی دیكە لە بەغداو پارێزگاكانی دیكەی عێراق لە سەعات 11ی شەو بۆ 5ی سەرلەبەیانی.

هەروەك یەكێكی دیكە لە بڕیارەكان ئەوەیە كە یانەكانی شەوانەو هۆڵەكانی بۆنەكان بەداخراوی دەمێننەوە رێگەیش بە هیچ گردبونەوەو قەرەباڵغییەك نادرێت.