بەشیر حەداد، جێگری سەرۆکی پەرلەمانی عێراق ڕایگەیاند، دواخستنی هەڵبژاردنی پێشوەختەی پەرلەمانی عێراق یەکێک لە ئەگەرەکانە، بەڵام کێشەی یاسایی بۆ بەردەوامیی کارەکانی پەرلەمانی عێراق دروست ناکات، ئاشکراشیكرد، ئەگەر هەڵبژاردن دوابخرێ، لەوانەیە بۆ مانگی 9ی ساڵی داهاتو دوابخرێت کە کاتی دیاریکراوی خۆیەتی.

ئاوێنە: بەشیر حەداد، جێگری سەرۆکی پەرلەمانی عێراق، ئەمڕۆ دوشەممە، بە میدیاكانی پارتی راگەیاند، دواخستنی هەڵبژاردنی پەرلەمانی عێراق لە دۆخی ئێستادا یەکێک لە ئەگەرەکانە، چونکە ئەنجامدانی هەڵبژاردن پێویستی بە زەمینەسازییەکی تەواوی سیاسی و ئەمنی و یاسایی هەیە، کە لەوانەیە لەو هەلومەرجەی کە هەیە لەو بارودۆخەی کە دروست بوە بەتایبەتی لە دوای کشانەوەی موقتەدا سەدر لە بەشداریی هەڵبژاردن، کە ئەوەش پرسی دواخستنی هەڵبژاردنی کردوە بە یەکێک لە ئەگەرەکان، چونکە لەوە دەچێت ئەو دۆخە گونجاو نەبێت بۆ ئەنجامدانی هەڵبژاردن.

وتیشی"لە ئەگەری دواخستنی هەڵبژاردن کە ئەگەری زۆرە بچێتە کاتی خۆی لە مانگی 9ی 2022، ئەوە لەو دۆخەدا پەرلەمانی عێراق کێشەی نابێت، چونکە بڕیاری داوە لە 7ی 10 خۆی هەڵبوەشێنێتەوە بەو (مەرج)ەی کە هەڵبژاردن ئەنجام بدرێ، کەواتە ئەگەر هەڵبژاردن ئەنجام نەدرا، ئەوە پەرلەمانی عێراق دەتوانێ بەردەوام بێت لە کاری ئاسایی خۆی، تا ئەو کاتەی لە دەستور دیاریکراوە کە 45 رۆژ پێش هەڵبژادنە."