سەرۆكی پارتی دیموكراتی كوردستان سەبارەت بە تەقینەوەكەی ناو بازاڕێكی شاری سەدر لە بەغدا پەیامێكی بڵاوكردەوە و ڕایگەیاند، ئەوانە دوژمنی ئایین و مرۆڤایەتی و پیرۆزییەكانن و دەبێت باجەكەی بدەن.
ئاوێنه: مەسعود بارزانی، سەرۆكی پارتی دیموكراتی كوردستان لە پەیامێكدا تەقینەوەكەی رۆژی دووشەممەی ناوچەی سەدری بەغدای ئیدانەكردەوە كە بەهۆیەوە زیاتر لە 30 كەس كوژران و بە دەیانی تر برینداربوون.
بارزانی ئاماژەی بەوەكردووە، ئەو تاوانە نیشانەی ئەوپەڕی بێویژدانی و نامرۆڤبوونی تیرۆریستانە، كە لە ڕۆژی عەرەفە و لەو كاتەی خەڵك خۆیان بۆ پێشوازی لە جەژن ئامادە دەكرد تاوانێكی قێزەونی لەوشێوەیە ئەنجام دەدەن.
سەرۆكی پارتی سەبارەت بە ئەنجامدەرانی تەقینەوەكەی رایگەیاندووە، ئەوانە دوژمنی ئایین و مرۆڤایەتی و پیرۆزییەكانن و لە هەموو بەهایەك شۆراون و دەبێ باجی ئەو تاوانەیان بدەن.
رۆژی دووشەممە بە هۆی تەقینەوەیەكەوە لە بازاڕێكی ناوچەی سەدری بەغدا دەیان كەس بوونە قوربانی و رێكخراوی داعشیش تەقینەوەكەی گرتە ئەستۆ.