بەپێی رۆژنامەی واشنتۆن پۆستی ئەمریكی لە رێگەی بەرنامەیەكی ئیسرائیلییەوە هەوڵی كردنە ئامانجی مۆبایلی زیاتر لە 50 هەزار كەس دراوە كە لەنێویاندا ژمارە مۆبایلی بەرهەم ساڵح، سەرۆك كۆماری عێراق و ئیمانوێل ماكرۆن، سەرۆكی فەرەنسا هەن.

ئاوێنە: بەپێی راپۆرتێكی رۆژنامەی واشنتۆن پۆست، لەنێو ئەو لیستە 50 هەزار كەسییەدا سەدان سیاسەتمەدارو بەرپرسی حكومەتی جیهان هەن كە لە رێگەی بەرنامەی پیگاسۆسی ئیسرائیلییەوە هەوڵدراوە مۆبایلەكانیان هاك بكرێن و سیخوڕییان بەسەرەوە بكرێت.

هێمای بۆ ئەوەش كردوە كە لەنێو لیستەكەدا سێ سەرۆكی ئێستای وڵاتان هەن كە پێكدێن لە ئیمانوێل ماكرۆن، سەرۆكی فەرەنساو بەرهەم ساڵح، سەرۆكی عێراق و سیریل رامافوزا، سەرۆكی ئەفریقای باشور، لەگەڵ پاشایەكدا.

هەروەك لیستەكە سێ سەرۆك وەزیرانی ئێستای وڵاتان و حەوت سەرۆك وەزیرانی پێشو لەخۆدەگرێت.

سەرۆكایەتی فەرەنسا لەبارەی ناوەڕۆكی راپۆرتەكەوە وتویەتی، ئەگەر ئەم زانیارییانە راست بن ئەوا "زۆر مەترسیدارن."

واشنتن پۆست ئاماژەی بەوەداوە كە نازانرێت ئایا هەوڵی هاککردنەکە دراوەو مۆبایلی ئەو كەسانە هاككراون یاخود هێشتا هەوڵی هاككردنیان نەدراوەو تەنها لەو لیستەدان بون بۆ ئەوەی هاك بكرێن.