بافڵ تاڵەبانی، هاوسەرۆكی یەكێتی، ئەمڕۆ دوشەممە، لە دەباشان لەگەڵ سەرجەم
لێپرسراوانی مەڵبەندەكانی حزبەكەی كۆبۆتەوە رایگەیاندوە"چاوەڕوانیمان لێتان ئەوەیە
حیزب و ژیانی سیاسی مەدەنی تەندروست بکرێتەوەو بەرێگای راستەقینەی یەکێتی نوێدا بڕوات."
ئاوێنە: بەپێی راگەیەندراوێكی نوسینگەكەی، بافڵ تاڵەبانی، ھاوسەرۆکی یەکێتیی
نیشتمانیی کوردستان، ئەمڕۆ لە دەباشان لەگەڵ لێپرسراوی سەرجەم مەڵبەندەکانی یەکێتی
کۆبوەوە.
لە راگەیەندراوەكەدا هاتوە"لەکۆبونەوەکەدا بافڵ تاڵەبانی رۆشنایی خستەسەر
دوایین پەرەسەندنە سیاسییەکان لە ھەرێم و عێراق. ھەڵوێست و ستراتیژی یەکێتی بۆ کۆی
ھاوکێشەکان رونکردەوە و جەختی لە سیاسەتی
نیشتمانی و ھاوسەنگی یەکێتی کردەوە بۆ پرسەکان و پاراستنی یەکڕیزی نێو ماڵی کوردی
بە گرنگ وەسفکرد."
ئەوەش خراوەتەڕو"لەبارەی بەرپرسیارێتی رێکخراوەیی و حزبی و رۆڵی
کادران و ئەندامانی یەکێتی، بافڵ تاڵەبانی بەرچاوڕونیدایە ئامادەبوان و ئەرکی ئەمڕۆی
رونکردەوە و رایگەیاند، مەڵبەندەکان و کادرانی رێکخستن شادەماری یەکێتین و ماندوبونیان
جێگای ستایش و پێزانینە. پێویستە وەک ھەمیشەش کادر و ئەندامانی یەکێتی خزمەتکاری خەڵک
بن و مەڵبەند و ئۆرگانەکانیش ببنەوە بە ماڵی راستەقینەی حیزبایەتی و تێکۆشانی سیاسی
و رێکخراوەیی، بەبێ جیاوازی پردی پەیوەندی گەیاندنی دەنگی کۆمەڵانی خەڵک بن بە یەکێتی
و حکومەت."
بەپێی راگەیەندراوەكە بافڵ تاڵەبانی بە لێپرسراوی مەڵبەندەکانیشی وت "چاوەڕوانیمان
لێتان ئەوەیە حیزب و ژیانی سیاسی مەدەنی تەندروست بکرێتەوە و بەرێگای راستەقینەی یەکێتی
نوێدا بڕوات."
هەر بەگوێرەی راگەیەندراوەكە بافڵ تاڵەبانی لێپرسراوانی مەڵبەندەكانی
حزبەكەی "راسپارد، کادران و ئەندامانی ھۆشیاری یەکێتی لەم ھەنگاوانەی چاکسازی
لە حیزب و حکومەت ئاگاداربکەنەوەو ئەو چاکسازییە بکەنە بەڵگەی دەستەگوڵی یەکێتی بۆ
ھاوڵاتییان و دەستمایەی سەرکەوتنی لیستی ھاوپەیمانی کوردستان لەم ھەڵبژاردنەدا."