بڕیاری نوێ‌ سەبارەت بە دۆخی كۆرۆنا لە هەرێم دەدرێت
  2021-08-03       408       

وەزیری تەندروستی حكومەتی هەرێمی كوردستان هۆشداری دەداتە هاووڵاتیان لە هەڵكشانی ئاماری تووشبوون و مردن بە ڤایرۆسی كۆرۆنا و دەشڵێت: “ڕاپۆرتێكمان لەگەڵ تەندروستی جیهانی ئامادەكردووە و بەپێی ئەوە بڕیار دەدرێت”.

ئاوێنه‌: د. سامان بەرزنجی، وەزیری تەندروستی هەرێم لە كۆنفڕانسێكی ڕۆژنامەوانیدا ڕایگەیاند، كە بڕێكی زۆر پێداویستی پزیشكی و ڤاكسینی كۆرۆنا گەیشتۆتە كۆگاكانی ناوەندیی وەزارەت و بەسەر بنكە و ناوەندە تەندروستییەكان دابەش دەكرێت.

ڕاشیگەیاند، پێویستە هاووڵاتیان خۆپارێزی بكەن و بەپێی پێویست نەبێت لەماڵ دەرنەچن و قەرەباڵغی كەم بكەنەوە، بۆ ئەوەی هێڵی مەترسی بڵاوبوونەوەی ڤایرۆسەكە كەم ببێتەوە.

ئاماژەی بەوەشكرد، ڕێژەی تووشبوون لەهەڵکشانە و کەم نەبۆتەوە، ئەمڕۆش تیمێکی پزیشکی ئەڵمانیا لەگەڵ پزیشکان و تەندروستی شارەکان کۆدەبنەوە، ئێمەش لەڕاپۆرتێکدا پێشنیارەکانی خۆمان دەدەین بەڕێکخراوی تەندروستی جیهانی، بابەتی هێڵی سوریش لەعیراق لەسەر سێ بنەما دیاری کراوە، ئێمەش پێشبینی دەکەین بەهۆ زۆری ژمارەکان لەم هێڵەبین.

ئاشكراشی كرد، لە ئێستادا دۆخی هەرێم لە هێڵی (نارنجی) دەرچووە و گەیشتۆتە هێڵی سووری بڵاوبوونەوەی كۆرۆنا و هەموو ڤایرۆسێكیش، كە وەك شەپۆلێك بڵاودەبێتەوە پێویستی بە چوار بۆ شەش هەفتەیە، بەڵام کۆڕۆنا هیچ پێشبینیەکی لەسەر نیە.

ئەم وتانەی وەزیری تەندروستی لەكاتێكدایە، كە تا ئێستا هەموو شوێن و بازاڕ و فەرمانگەكان كراوەن و قەرەباڵغییەكی زۆر هەیە و ڕۆژ بەڕۆژ ژمارەی تووشبوون و مردن هەڵدەكشێت و تا ئێستا هیچ بڕیارێك بۆ توند كردنی ڕێكارە خۆپارێزییەكان دەرنەكراوە و بڕیاریشە جارێكی دیكە لیژنە باڵاكەی هەرێم كۆببێتەوە و بڕیاری دیكە دەربكات.
زۆرترین بینراو
© 2021 Awene Online, Inc. All Rights Reserved.
×